पोलीस भरतीची तयारी करणाऱ्या तरुणीचा मृत्यू; शिक्षकावर गुन्हा दाखल

मुंबई : निर्भीड समाचार वृत्तसेवा

पोलीस दलात भरती होऊन देशसेवा करण्याचे आणि आपल्या कुटुंबाचे नाव उज्ज्वल करण्याचे स्वप्न उराशी बाळगून दिवसरात्र मेहनत करणाऱ्या एका २५ वर्षीय तरुणीचा प्रवास अत्यंत दुर्दैवी वळणावर संपला आहे. जुन्नर तालुक्यातील आळेफाटा येथील एका खासगी प्रशिक्षण अकॅडमीत येणाऱ्या भयंकर अनुभवामुळे आणि शिक्षकाकडून होणाऱ्या सततच्या मानहानीमुळे व्यथित होऊन भाग्यश्री भास्कर भंडारी या तरुणीने मृत्यूला कवटाळले. भाग्यश्रीने राहत्या खोलीत गळफास घेऊन आत्महत्या केल्याची धक्कादायक घटना सोमवारी (१० ऑगस्ट २०२६) समोर आली. या घटनेमुळे पारनेर आणि आळेफाटा परिसरात तीव्र संताप व हळहळ व्यक्त होत आहे.

मूळची अहिल्यानगर जिल्ह्यातील पारनेर तालुक्यातील आळकुटी येथील असलेली भाग्यश्री गेल्या काही महिन्यांपासून आळेफाटा येथे भाड्याची खोली घेऊन राहत होती. येथील नामांकित ‘सह्याद्री अकॅडमी’मध्ये ती पोलीस भरतीसाठी लागणारे मैदानी आणि लेखी परीक्षेचे कडक प्रशिक्षण घेत होती. कुटुंबाच्या गरिबीवर मात करत स्वतःच्या पायावर उभे राहण्यासाठी ती मैदानावर घाम गाळत होती.मात्र, गेल्या काही दिवसांपासून अकॅडमीतील शिक्षक मयूर अशोक डुंबरे (रा. खामुंडी, ता. जुन्नर) याच्याकडून तिला मानसिक त्रास दिला जात होता. वर्गात आणि मैदानावर इतर विद्यार्थ्यांसमोर तिला अपमानास्पद वागणूक दिली जात होती, ज्यामुळे ती प्रचंड मानसिक दबावाखाली होती.

भाग्यश्रीची बहीण शितल भंडारी ही शासकीय सेवेत कार्यरत आहे. तिने आळेफाटा पोलीस ठाण्यात दिलेल्या फिर्यादीनुसार, यापूर्वी घडलेल्या एका घटनेच्या पार्श्वभूमीवर शिक्षक मयूर डुंबरे याला पोलीस ठाण्यात जावे लागले होते. याच गोष्टीचा मनात राग धरून डुंबरे याने भाग्यश्रीला पद्धतशीरपणे लक्ष्य करण्यास सुरुवात केली होती.मैदानावर धावताना किंवा सराव करताना क्षुल्लक कारणांवरून तिला टोमणे मारणे, इतर मुलांसमोर तिचा वारंवार अपमान करणे आणि तिचे मानसिक खच्चीकरण करणे असे प्रकार अकॅडमीत सुरू होते. बहिणीने दिलेल्या माहितीनुसार, त्यांनी या त्रासाबद्दल मयूर डुंबरे याला फोनवरून समजावण्याचा प्रयत्नही केला होता, मात्र त्याच्या वर्तनात कोणताही बदल झाला नाही. अखेर या रोजच्या जाचाला आणि अपमानाला कंटाळून भाग्यश्रीने टोकाचे पाऊल उचलले.

भाग्यश्रीच्या मृत्यूनंतर तिच्या नातेवाईकांनी आळेफाटा पोलीस ठाण्यात एकच गर्दी केली होती. दोषी शिक्षकाला तात्काळ अटक करावी, या मागणीसाठी कुटुंबीय आक्रमक झाले होते. भाग्यश्रीच्या बहिणीने दिलेल्या अधिकृत तक्रारीच्या आधारे आळेफाटा पोलिसांनी संशयित शिक्षक मयूर अशोक डुंबरे याच्याविरोधात भारतीय न्याय संहितेच्या संबंधित कलमांनुसार आत्महत्येस प्रवृत्त केल्याचा (Abetment of Suicide) गुन्हा दाखल केला आहे. पोलीस निरीक्षक विश्वास जाधव यांच्या मार्गदर्शनाखाली या प्रकरणाचा सखोल तपास सुरू आहे.

भाग्यश्रीच्या या दुर्दैवी आत्महत्येमुळे राज्यातील आणि विशेषतः पुणे-नगर जिल्ह्यातील खासगी पोलीस भरती अकॅडमींच्या कारभारावर आणि तेथील संस्कृतीवर मोठे प्रश्नचिन्ह निर्माण झाले आहे. खाकी वर्दीचे स्वप्न घेऊन येणाऱ्या ग्रामीण भागातील तरुण-तरुणींवर प्रशिक्षणाच्या नावाखाली असा मानसिक दबाव किंवा छळ केला जातो का? याची प्रशासनाने कडक चौकशी करावी, अशी मागणी आता पालकांकडून केली जात आहे.अहिल्यानगरच्या मातीतून मोठ्या आशेने बाहेर पडलेली भाग्यश्री आता कधीच पोलिसांच्या गणवेशात दिसणार नाही, या विचाराने तिच्या वृद्ध आई-वडिलांवर दुःखाचा डोंगर कोसळला आहे. एका महत्त्वाकांक्षी तरुणीला आत्महत्येस प्रवृत्त करणाऱ्या या शिक्षकाला कठोर शिक्षा व्हावी, अशी मागणी संपूर्ण महाराष्ट्रातून होत आहे.