नगरसेविका अनन्या बॅनर्जी यांच्या कार्यालयात आक्षेपार्ह वस्तू; मोठी खळबळ!

मुंबई/कोलकाता : निर्भीड समाचार वृत्तसेवा

पश्चिम बंगालमधील सत्ताधारी तृणमूल काँग्रेस (TMC) पक्षाच्या अडचणींमध्ये सातत्याने वाढ होत असतानाच, आता कोलकातामधून एक धक्कादायक आणि अत्यंत लाजीरवाणी घटना समोर आली आहे. कोलकाता महानगरपालिकेच्या (KMC) वॉर्ड क्रमांक १०९ च्या तृणमूल काँग्रेसच्या नगरसेविका आणि टॉलीवूड अभिनेत्री अनन्या बॅनर्जी यांच्या मुकुंदपूर येथील अधिकृत वॉर्ड कार्यालयातून कंडोमची पाकिटे, मसाज मशीन्स, गुप्त मेकअप रूम आणि मोठ्या प्रमाणावर रोकड जप्त करण्यात आल्याचा दावा स्थानिक नागरिक आणि विरोधी पक्षांनी केला आहे. या प्रकारामुळे संपूर्ण पश्चिम बंगालच्या राजकीय वर्तुळात प्रचंड खळबळ उडाली असून “हे लोकप्रतिनिधींचे कार्यालय आहे की ऐषारामाचा अड्डा?” असा संतप्त सवाल सर्वसामान्यांकडून उपस्थित केला जात आहे.

मुकुंदपूर कार्यालयाचा कुलूप तोडून नागरिकांचा प्रवेश
कार्यालयाची तपासणी केली असता, त्या ठिकाणी एका लोकप्रतिनिधीच्या कार्यालयाला न शोभणाऱ्या अनेक आक्षेपार्ह वस्तू आढळून आल्याचा दावा करण्यात आला आहे. यामध्ये प्रामुख्याने खालील गोष्टींचा समावेश आहे:

1. गुप्त मेकअप रूम आणि बेड: कार्यालयाच्या आत एक अत्यंत आधुनिक आणि सुसज्ज ‘मेकअप रूम’ तयार करण्यात आली होती. तिथे एक आलिशान ड्रेसिंग टेबल, वातानुकूलित यंत्रणा (AC) आणि सोफा कम बेडची व्यवस्था करण्यात आली होती.

2. आक्षेपार्ह वस्तू: या गुप्त खोलीतून मोठ्या प्रमाणावर कंडोमची पाकिटे, गर्भनिरोधक गोळ्या आणि विविध प्रकारच्या मसाज मशीन्स जप्त करण्यात आल्या.

3. रोकड आणि सरकारी साहित्य: कार्यालयात ठिकठिकाणी रोकड विखुरलेली पाहायला मिळाली. याशिवाय गरिबांना वाटपासाठी असलेले सरकारी साहाय्य साहित्य, ज्यात शेकडो धोती आणि साड्यांचा समावेश होता, ते गोण्यांमध्ये भरून बेकायदेशीरपणे लपवून ठेवण्यात आले होते.

‘येलो लेजर’ डायरीमुळे भरती घोटाळ्याचा संशय
या संपूर्ण धाडीत सर्वात मोठा आणि गंभीर खुलासा एका पिवळ्या रंगाच्या नोंदवहीतून (‘येलो लेजर’ डायरी) झाला आहे. या डायरीमध्ये आरोग्य विभाग आणि इतर अनेक सरकारी खात्यांमध्ये नोकऱ्या मिळवून देण्याच्या नावाखाली घेतलेल्या लाखो रुपयांच्या लाचेचा (कट मनी) सविस्तर हिशोब लिहिलेला असल्याचा आरोप भाजपने केला आहे. कोणत्या व्यक्तीकडून किती रुपये घेतले आणि कोणाला नोकरीची शिफारस केली, याचे संपूर्ण कच्चे चिट्ठे या डायरीत नोंदवले गेले आहेत. तसेच स्थानिक बिल्डर्स आणि प्रमोटर्सकडून वसूल केल्या जाणाऱ्या खंडणीचा (‘तोलाबाजी’) रेट चार्टही येथे सापडला आहे.

खंडणी आणि बेकायदेशीर ताब्याचे गंभीर आरोप
स्थानिक रहिवासी शिपन दास यांच्या दाव्यानुसार, परिसरात स्वतःचे घर बांधताना अनन्या बॅनर्जी यांच्या गुंडांनी त्यांच्याकडे १ लाख रुपयांची बेकायदेशीर खंडणी मागितली होती आणि ती न दिल्याने काम थांबवले होते. एका अन्य पीडित महिलेने आरोप केला आहे की, बॅनर्जी यांनी तिच्या फ्लॅटवर गेल्या १० वर्षांपासून बेकायदेशीरपणे ताला ठोकून कब्जा केला आहे. विरोध करणाऱ्या नागरिकांना आणि भाजप समर्थकांना खोट्या गुन्ह्यांमध्ये अडकवण्याची धमकी या नगरसेविकेकडून दिली जात असल्याचा आरोप स्थानिकांनी केला आहे.

नगरसेविका अनन्या बॅनर्जी यांचे स्पष्टीकरण
या सर्व वादावर आणि गंभीर आरोपांवर नगरसेविका अनन्या बॅनर्जी यांनी आपले स्पष्टीकरण दिले आहे. त्यांनी सर्व आरोप फेटाळून लावत हा आपल्याविरुद्ध रचलेला राजकीय कट असल्याचे म्हटले आहे. बॅनर्जी म्हणाल्या, “८ जून रोजीच बोर्ड बरखास्त झाल्यामुळे हे कार्यालय आता माझ्या ताब्यात नाही. हे कोलकाता पालिकेचे सरकारी कार्यालय असून तिथे सरकारी अधिकारीही येत-जात असत. तिथे कोणतीही मेकअप रूम नाही, तर ती फक्त जेवणासाठी आणि विश्रांतीसाठीची अँटी-चेंबर (Antechamber) आहे. काही लोकांनी विनापरवाना आत घुसून राजकीय हेतूने गोष्टी पेरल्या आहेत आणि चुकीचा देखावा तयार केला आहे.

दरम्यान, या घटनेचे व्हिडिओ सोशल मीडियावर तुफान व्हायरल झाले असून, पश्चिम बंगालमधील कथित भ्रष्टाचाराच्या मुद्द्यावरून तृणमूल काँग्रेस बॅकफूटवर आली आहे. विरोधी पक्षांनी या प्रकरणाची सखोल चौकशी करून अनन्या बॅनर्जी यांना तात्काळ अटक करण्याची मागणी केली आहे.