मुंबईत INOX ला १० कोटींचा गंडा; ‘बॉस’चा फेक मेसेज!

मुंबई : निर्भीड समाचार वृत्तसेवा

देशात सायबर गुन्हेगारीने आता अत्यंत भयानक रूप धारण केले आहे. मुंबईमध्ये कॉर्पोरेट क्षेत्राला हादरवून सोडणारी एक मोठी ठगीची घटना उघडकीस आली आहे. मल्टिप्लेक्स आणि इंडस्ट्रियल गॅस क्षेत्रात कार्यरत असणाऱ्या नामांकित INOX ग्रुपच्या एका अत्यंत अनुभवी आणि वरिष्ठ अकाउंट्स एक्झिक्युटिव्हला (Senior Accounts Executive) सायबर गुन्हेगारांनी आपल्या जाळ्यात ओढले. कंपनीच्या बॉसच्या नावाचा वापर करून एका अज्ञात नंबरवरून आलेल्या संदेशांना खरे मानून अधिकाऱ्याने कंपनीच्या खात्यातून १० कोटी ४० लाख ७१ हजार ९२४ रुपये अज्ञात खात्यांमध्ये ट्रान्सफर केले.

व्हॉट्सअ‍ॅप डीपी (DP) मध्ये बॉसचा फोटो पाहून फसला अधिकारी
मिळालेल्या माहितीनुसार, मुंबईतील INOX च्या वरिष्ठ अधिकाऱ्याला या महिन्याच्या सुरुवातीला एका अनोळखी नंबरवरून व्हॉट्सअ‍ॅपवर मेसेज आला. या व्हॉट्सअ‍ॅप नंबरच्या प्रोफाइल पिक्चर (DP) वर INOX ग्रुपचे कार्यकारी संचालक (Executive Director) सिद्धार्थ जैन (Siddharth Jain) यांचा फोटो लावण्यात आला होता. त्यामुळे हा मेसेज थेट आपल्या सर्वोच्च बॉसचाच आहे, असा ठाम विश्वास या ३१ वर्षांचा प्रदीर्घ अनुभव असलेल्या वरिष्ठ अकाउंट्स अधिकाऱ्याला झाला.सायबर ठगाने सिद्धार्थ जैन बनून पीडित अधिकाऱ्याला व्हॉट्सअ‍ॅपवर काही व्यावसायिक कामांसाठी तातडीने पैसे पाठवण्याचे आदेश दिले. मेसेजमध्ये अत्यंत गोपनीय आणि तातडीचे काम असल्याचे भासवत वेगवेगळ्या बँक खात्यांचे तपशील (Beneficiary Accounts) शेअर करण्यात आले.

३ जून ते १५ जून दरम्यान धडाधड ६३ ट्रान्झॅक्शन
पीडित अधिकाऱ्याने बॉसच्या आदेशाचे पालन करत ३ जून ते १५ जून २०२६ या अवघ्या दोन आठवड्यांच्या कालावधीत एकामागून एक तब्बल ६३ वेगवेगळे व्यवहार केले. ठगाने सांगितलेल्या बँक खात्यांमध्ये आरटीजीएस (RTGS) आणि इतर ऑनलाईन माध्यमांतून कोट्यवधी रुपये ट्रान्सफर करण्यात आले. हा सर्व व्यवहार सुरू असताना अधिकाऱ्याने एकदाही फोन करून किंवा प्रत्यक्ष भेटून या व्यवहारांची शहानिशा केली नाही.

असा उघडकीस आला कोट्यवधींचा घोटाळा
हा संपूर्ण गैरप्रकार मंगळवारी (१६ जून) तेव्हा उघडकीस आला, जेव्हा अकाउंट्स अधिकाऱ्याने अधिकृत चॅनेल किंवा ई-मेलद्वारे थेट कार्यकारी संचालक सिद्धार्थ जैन यांच्याशी संपर्क साधला. या ६३ मोठ्या व्यवहारांचे बिल (Invoices) आणि ऑडिटचे दस्तऐवज मागण्यासाठी अधिकाऱ्याने जैन यांना विचारणा केली.हे ऐकून सिद्धार्थ जैन यांना मोठा धक्का बसला. त्यांनी आपण असा कोणताही व्हॉट्सअ‍ॅप मेसेज केला नसल्याचे आणि कोणत्याही पैशांच्या ट्रान्सफरचे आदेश दिले नसल्याचे स्पष्ट केले. त्यानंतर आपल्यासोबत खूप मोठी फसवणूक झाल्याचे त्या अधिकाऱ्याच्या लक्षात आले.

पोलिसांत तक्रार आणि दिल्लीतून चौघांना अटक
फसवणूक झाल्याचे समजताच अधिकाऱ्याने तात्काळ १९३० या राष्ट्रीय सायबर हेल्पलाइनवर तक्रार नोंदवली आणि पोलिसात धाव घेत व्हॉट्सअ‍ॅप चॅटचे स्क्रीनशॉट्स पुराव्यासाठी सादर केले. या प्रकरणाचे गांभीर्य ओळखून पोलिसांनी तपास चक्र वेगाने फिरवली. या गुन्ह्याची पाळेमुळे दिल्लीत असल्याचे तपासात समोर आले.या चोरीच्या पैशांचे मनी लाँड्रिंग करणाऱ्या आणि बनावट बँक खाती पुरवणाऱ्या टोळीतील चार आरोपींना दिल्ली पोलिसांनी अटक केली आहे. या संपूर्ण रॅकेटचा मुख्य सूत्रधार अद्याप फरार असून, पोलीस त्याचा शोध घेत आहेत.