संचिता उगले आत्महत्या: वडिलांचा धक्कादायक खुलासा!

मुंबई : निर्भीड समाचार वृत्तसेवा

‘कुमकुम भाग्य’ आणि ‘वागले की दुनिया’ फेम प्रसिद्ध २२ वर्षीय टेलिव्हिजन अभिनेत्री संचिता उगले हिने नालासोपारा येथील राहत्या घरी गळफास लावून आत्महत्या केल्याची धक्कादायक घटना समोर आली आहे. तिच्या या अचानक जाण्याने संपूर्ण मनोरंजन विश्वामध्ये खळबळ उडाली असून, चाहत्यांना मोठा धक्का बसला आहे. संचिताने रविवारी, १४ जून रोजी टोकाचे पाऊल उचलले. या घटनेनंतर तिचे वडील मच्छिंद्र उगले यांनी माध्यमांसमोर येत अत्यंत भावनिक आणि धक्कादायक खुलासा केला आहे. “आम्ही सतत तिच्यासोबत असायचो, पण केवळ त्या एका अर्ध्या तासासाठी ती घरात एकटी होती आणि तिथेच घात झाला,” असा हृदयद्रावक दावा तिच्या वडिलांनी केला आहे.

‘फक्त अर्ध्या तासासाठी…’ वडिलांचा अश्रूभारे दावा
संचिताचे वडील मच्छिंद्र उगले यांनी ‘NDTV’ ला दिलेल्या मुलाखतीत सांगितले की, गेल्या काही महिन्यांपासून संचिता अत्यंत मानसिक तणावाखाली आणि नैराश्यात (डिप्रेशन) वावरत होती. बाहेरून किंवा कॅमेऱ्यासमोर ती कितीही आनंदी दिसत असली, तरी घरी आल्यावर ती अचानक तीव्र नैराश्यात जायची. संचिताची ही बदलती मानसिक स्थिती घरच्यांच्या लक्षात आली होती.

तिला मानसिक आधाराची गरज आहे हे ओळखून कुटुंब तिला कधीही एकटे सोडत नव्हते. तिचे वडील दररोज तिच्यासोबत प्रवासात आणि कामाच्या ठिकाणी स्वतः सोबत ये-जा (अप-डाऊन) करत असत. रविवारी संध्याकाळी संचिताची बहीण काही कामासाठी अवघ्या अर्ध्या तासासाठी घराबाहेर पडली होती. “आम्ही तिला कधीच एकटे सोडत नव्हतो. पण दुर्दैवाने, रविवारी संध्याकाळी ज्या अवघ्या अर्ध्या तासाच्या काळात ती घरात एकटी होती, नेमकी त्याच वेळी तिने हे टोकाचे पाऊल उचलले. ती आमची मोठी चूक झाली,” अशी आर्त खंत तिच्या वडिलांनी व्यक्त केली.

कामाच्या ठिकाणी मानसिक छळ आणि पैशांची मागणी?
संचिताच्या निधनानंतर तिच्या कुटुंबाने मनोरंजन क्षेत्रातील (इंडस्ट्री) काही घटकांवर अत्यंत गंभीर आरोप केले आहेत. वडिलांच्या दाव्यानुसार, संचिताला कामाच्या ठिकाणी काही लोकांकडून सतत ‘टॉर्चर’ आणि मानसिक त्रास दिला जात होता. तिच्यावर विविध प्रकारे मानसिक दबाव (हॅमरींग) आणला जात होता, तसेच काही लोकांकडून पैशांची मागणी करूनही तिला धमकावले जात असल्याचा संशय व्यक्त करण्यात आला आहे.

तिची मावशी आणि भावानेही माध्यमांशी बोलताना सांगितले की, जर संचिताने तिच्यावर होणाऱ्या या मानसिक अन्यायाबद्दल आधीच कुटुंबाला स्पष्टपणे सांगितले असते, तर कदाचित हा अनर्थ टळू शकला असता. इंडस्ट्रीतील लोकांच्या या वाढत्या दबावामुळेच एका हसत्या-खेळत्या मुलीला आपले जीवन संपवावे लागले, असे कुटुंबाचे म्हणणे आहे.

गॉडफादरशिवाय बनवले होते स्थान; आजोबांचा आक्रोश
मूळची अहिल्यानगर (अहमदनगर) जिल्ह्यातील असणारी संचिता प्रचंड गुणी आणि कष्टाळू मुलगी होती, असे तिच्या आजोबांनी भरल्या डोळ्यांनी सांगितले. “इंडस्ट्रीत कोणताही गॉडफादर नसताना तिने केवळ स्वतःच्या हिमतीवर आणि मेहनतीने हे यश मिळवले होते,” असे आजोबा गोपीनाथ म्हणाले. ‘साजन घर’ या मालिकेतील तिच्या ‘पूजा’ या भूमिकेने तिला घराघरात पोहोचवले होते. तिच्याकडे कामाची कोणतीही कमतरता नव्हती किंवा पैशांचीही चणचण नव्हती, त्यामुळे काम न मिळाल्याने तिने आत्महत्या केल्याच्या अफवा पूर्णपणे खोट्या असल्याचे आजोबांनी स्पष्ट केले.

पोलिसांकडून सखोल तपास सुरू
या प्रकरणी पालघर जिल्ह्यातील आचोळे पोलिसांनी सध्या अकस्मात मृत्यूची नोंद केली असून अधिक तपास सुरू केला आहे. घटनास्थळावरून पोलिसांना कोणतीही सुसाईड नोट मिळालेली नाही. परंतु, कुटुंबाने केलेल्या गंभीर आरोपांनंतर पोलिसांनी संचिताचा मोबाईल फोन ताब्यात घेतला आहे. तिच्या व्हॉट्सॲप चॅट्स, कॉल रेकॉर्ड्स आणि सोशल मीडिया डेटाच्या माध्यमातून तिला नक्की कोण त्रास देत होते, याचा शोध पोलीस घेत आहेत.

दरम्यान, ‘ऑल इंडियन सिने वर्कर्स असोसिएशन’ (AICWA) ने देखील या प्रकरणाची दखल घेतली असून, महाराष्ट्राचे मुख्यमंत्री देवेंद्र फडणवीस यांना पत्र लिहून या संशयास्पद मृत्यूची उच्चस्तरीय चौकशी करण्याची मागणी केली आहे. मनोरंजन विश्वातील वाढता मानसिक ताण आणि कलाकारांचे आरोग्य यावर आता पुन्हा एकदा मोठी चर्चा सुरू झाली आहे. “माझ्या मुलीला ज्या त्रासातून जावे लागले, त्याचे खरे सत्य समोर आलेच पाहिजे आणि तिला न्याय मिळाला पाहिजे,” अशी आर्त हाक तिच्या वडिलांनी प्रशासनाला दिली आहे.