पत्रकाराला जीवे मारण्याची धमकी!
छत्रपती संभाजीनगर | एकीकडे देशभरात लोकशाहीचा उत्सव केला जात आहे. तर दुसरीकडे देशासह राज्यात असे काही प्रकार घडत आहेत त्यामुळे लोकशाहीवर प्रश्नचिन्ह उपस्थित होत आहे. राज्यात नेत्यांकडून धमक्या मिळण्याचं सत्र काही दिवसांपासून सुरूच आहे. असाच एक प्रकार छत्रपती संभाजीनगरमध्ये घडला आहे.
आमच्या विरोधात बातमी का लावलीस? असे म्हणत ‘महाराष्ट्र देशा’ या नामांकित न्यूज पोर्टलच्या पत्रकारास जीवे मारण्याची धमकी देण्यात आल्याचा धक्कादायक प्रकार समोर आला आहे. या प्रकरणी भाजपच्या तीन नेत्यांवर पुणे येथे गुन्हा दाखल करण्यात आला आहे.
लोकसभा निवडणुकीच्या अनुषंगाने “महाराष्ट्र देशा” या वेब न्यूज पोर्टलवर ‘संदीपान भुमरेंना मोठा झटका? जलील निवडून येणार असेल तर खैरेंना मदत?’ अशा प्रकारची बातमी प्रसिद्ध करण्यात आली होती. ही बातमी प्रसिद्ध झाल्यानंतर महायुतीमध्ये खळबळ माजली होती.
भाजपचे प्रदेश प्रवक्ते शिरीष बोराळकर, भाजपा अनुसूचित मोर्चाचे प्रदेश सरचिटणीस जालिंदर शेंडगे, भाजप प्रदेश कार्यकारिणी सदस्य अनिल मकरिये आदींनी फोन करून आमच्या विरोधात बातमी लावतो का? असं म्हणत ‘महाराष्ट्र देशा’ च्या पत्रकारांना जीवे मारण्याची धमकी दिली. यामागे मोठे षडयंत्र असल्याचे पत्रकारांनी सांगितलं आहे.
सदरिल व्यक्तींपासून माझ्या जीवितास धोका आहे, अशी तक्रार पत्रकाराने पुणे येथील हिंजवडी पोलीस ठाणे, पिंपरी चिंचवड मध्ये भादंवी कलम ५०७ प्रमाणे वरती नमूद तिन्ही नेत्यांवर गुन्हा दाखल करण्यात आला आहे.
राज्यात याआधीही पत्रकारांवर जीवघेणा हल्ला करण्याचे प्रकार घडले आहेत, त्यामुळे पत्रकारांचं संरक्षण करण्यासाठी महाराष्ट्रात ‘पत्रकार सुरक्षा कायदा’ लागू करण्यात आला, त्यानंतरही पत्रकारांना अशाप्रकारे जीवे मारण्याची धमकी देण्याचे प्रकार घडत आहेत. या प्रकारामुळे राज्यातील पत्रकारांमध्ये संतापाचं वातावरण आहे. सदर प्रकरणातील नेत्यांवर कठोर कारवाई करण्याची मागणी होत आहे. अन्यथा तीव्र आंदोलनाचा इशारा देण्यात आला आहे.
