मुस्लीम मुलाशी लग्न आणि लव्ह जिहादच्या ट्रोलिंगवर शाल्मलीने तोडले मौन!

मुंबई : निर्भीड समाचार वृत्तसेवा

‘परेशान’, ‘बलम पिचकारी’ आणि ‘दारू देसी’ यांसारख्या अनेक सुपरहिट गाण्यांनी बॉलिवूड आणि मराठी संगीतसृष्टी गाजवणारी सुप्रसिद्ध गायिका शाल्मली खोलगडे (Shalmali Kholgade) सध्या तिच्या एका जाहीर वक्तव्यामुळे प्रचंड चर्चेत आली आहे. शाल्मलीने नोव्हेंबर २०२१ मध्ये तिचा दीर्घकाळाचा मित्र आणि साऊंड इंजिनिअर फरहान शेख (Farhan Shaikh) सोबत आंतरधर्मीय विवाह केला होता. वयाच्या ३१व्या वर्षी एका मुस्लीम मुलासोबत लग्न केल्यामुळे तिला सोशल मीडियावर प्रचंड ट्रोलिंगचा सामना करावा लागला होता. अनेकांनी तिच्या या लग्नाला थेट ‘लव्ह जिहाद’ची उपमाही दिली होती. या सर्व वादावर आणि ट्रोलिंगवर शाल्मलीने नुकत्याच ‘ह्युमन्स ऑफ बॉम्बे’ (Humans of Bombay) ला दिलेल्या एका रोकठोक मुलाखतीत पहिल्यांदाच उघडपणे भाष्य केले आहे.

शाल्मलीने सांगितले की, जेव्हा ती फरहानच्या प्रेमात पडली, तेव्हा तिच्या पुरोगामी विचारांच्या मराठमोळ्या पालकांनी त्यांच्या या नात्याला कधीच विरोध केला नाही. तिच्या पालकांसाठी धर्मापेक्षा ‘मुलगा कसा आहे?’ हे जाणून घेणे महत्त्वाचे होते. लग्नाचा निर्णय घेण्यापूर्वी शाल्मलीच्या आईने तिला दोन अत्यंत महत्त्वाचे प्रश्न विचारले होते.

पहिला प्रश्न: “तुझं त्याच्यावर आणि त्याचं तुझ्यावर खरंच मनापासून प्रेम आहे का?

दुसरा प्रश्न: “तुला भविष्यात मुलं हवी आहेत का? आणि त्याला याबद्दल काय वाटतं?

यावर शाल्मलीने जेव्हा “आम्हा दोघांनाही मुलं नको आहेत,” असे उत्तर दिले, तेव्हा तिच्या आईने सांगितले की, अशा महत्त्वाच्या विषयांवर तुमच्या दोघांचे एकमत असणे गरजेचे आहे. इतकेच नव्हे तर, या मुलाखतीत शाल्मलीने एका रंजक गोष्टीचा खुलासा केला. तिच्या आईने तिला थेट “तुमच्यातले शारीरिक संबंध (Physical Relationship) कसे आहेत?” असा अत्यंत बोल्ड प्रश्न विचारला होता. हा प्रश्न ऐकून शाल्मली आधी चक्रावून गेली, कारण घरात कधी अशा विषयावर जाहीर चर्चा झाली नव्हती. पण तिच्या आईने समजूत काढत सांगितले की, “लग्न यशस्वी होण्यासाठी आणि ते टिकवण्यासाठी या सर्व गोष्टींचा आधीच विचार करून ठेवणे अत्यंत महत्त्वाचे असते.” पालकांच्या या सकारात्मक पाठिंब्यामुळेच शाल्मलीच्या लग्नाचा मार्ग मोकळा झाला.

आंतरधर्मीय विवाहामुळे होणाऱ्या ट्रोलिंगला सडेतोड उत्तर देताना शाल्मली म्हणाली, “आम्ही लग्नाआधी ६ वर्षे एकमेकांसोबत नात्यात होतो. लॉकडाऊनच्या काळात तर आम्ही संपूर्ण वर्ष एकत्र राहिलो. त्यामुळे एकमेकांचे स्वभाव, सवयी आम्ही अगदी जवळून ओळखत होतो. मी हिंदू असले तरी फरहानच्या आईने किंवा बहिणीने मला कधीच धर्मांतर (Religion Conversion) करण्यासाठी सांगितले नाही किंवा आमच्या नात्याला विरोध केला नाही.”पुढे बोलताना ती म्हणाली, “आमच्या दोन्ही कुटुंबियांना एकमेकांबाबत कोणतीही अडचण नव्हती आणि आम्हालाही हेच हवे होते. मूळ प्रॉब्लेम फक्त या समाजाला होतो. लोकांनी आमच्या लग्नाला ‘लव्ह जिहाद’ (Love Jihad) चे नाव दिले. पण आम्ही त्याकडे कधीच लक्ष दिले नाही.

आंतरधर्मीय लग्नावरून नातेवाईक किंवा समाजातील लोक जेव्हा शाल्मलीच्या आईला टोमणे मारण्याचा किंवा प्रश्न विचारण्याचा प्रयत्न करतात, तेव्हा तिची आई त्यांना कशा प्रकारे गप्प करते, याचा एक मजेशीर किस्साही शाल्मलीने शेअर केला. शाल्मली म्हणाली, “जेव्हाही कोणी फरहानबद्दल किंवा आमच्या आंतरधर्मीय लग्नाबद्दल आईला प्रश्न विचारण्यास सुरुवात करतं, तेव्हा माझी आई समोरच्या व्यक्तीला त्याचे वाक्य पूर्ण करण्याची संधीच देत नाही. ती लगेचच मधेच बोलून माझा जावई ‘फरहान’ किती गुणी, देखणा आणि समजूतदार आहे, त्याचे कुटुंब किती छान आहे, हे सांगायला सुरुवात करते. आई जावयाचे इतके गुणगान गाते की प्रश्न विचारणारा माणूस स्वतःच थक्क होऊन तिथून निघून जातो.

शाल्मली आणि फरहानचे लग्न २२ नोव्हेंबर २०२१ रोजी कोणत्याही मोठ्या गाजावाजाशिवाय, अतिशय साध्या पद्धतीने त्यांच्या मुंबईतील घराच्या दिवाणखान्यात (Living Room) पार पडले होते. या लग्नाला केवळ त्यांचे आई-वडील आणि भावंडे उपस्थित होती. कोणत्याही मोठ्या सोहळ्यापेक्षा एकमेकांवरील प्रेम आणि कुटुंबियांचा आनंद यांच्यासाठी जास्त महत्त्वाचा होता, हेच शाल्मलीच्या या नव्या मुलाखतीतून पुन्हा एकदा स्पष्ट झाले आहे.तिची ही स्पष्टवक्ती आणि धाडसी मुलाखत सध्या सोशल मीडियावर प्रचंड व्हायरल होत असून, अनेक चाहत्यांनी तिच्या आणि तिच्या पालकांच्या प्रगतीशील विचारांचे कौतुक केले आहे.