पांडेनगरचा ‘फॉरेस्ट’ प्रश्न मार्गी लावणार; आमदार प्रवीण दरेकर यांचा रहिवाशांना शब्द!
मुंबई : निर्भीड समाचार News Desk
मुंबईतील पांडेनगर येथील रहिवाशांच्या प्रलंबित असलेल्या ‘फॉरेस्ट’ (Forest) जमिनीच्या प्रश्नावर अखेर तोडगा निघण्याची चिन्हे दिसत आहेत. कॅबिनेट मंत्री तथा आ. प्रवीण दरेकर यांच्या अध्यक्षतेखाली आणि माजी नगरसेविका सौ. निशाताई परुळेकर यांच्या विशेष पुढाकाराने ‘श्री समर्थ कृपा रहिवाशी सेवा संघ’ पांडेनगरच्या आजी-माजी कमिटीची एक महत्त्वपूर्ण संयुक्त बैठक पार पडली. या बैठकीत आमदार दरेकर यांनी रहिवाशांना पूर्णपणे आश्वस्त केले असून, “आम्ही कायम रहिवाशांसोबत आहोत,” असा ठाम शब्द दिला आहे.
गेल्या अनेक दिवसांपासून पांडेनगरमधील रहिवाशांना फॉरेस्ट जमिनीच्या तांत्रिक अडचणींमुळे विविध समस्यांचा सामना करावा लागत आहे. या बैठकीत या विषयावर सविस्तर चर्चा करण्यात आली. आमदार प्रवीण दरेकर यांनी स्पष्ट केले की, “हा विषय सध्या न्यायालयीन प्रक्रियेत (Court Matter) आहे. न्यायालयीन लढाईत शासन आणि आम्ही सर्वजण रहिवाशांच्या बाजूने ठाम आहोत. त्यामुळे पांडेनगरमधील कोणत्याही नागरिकाने भयभीत होण्याची गरज नाही. विशेषतः सोशल मीडिया किंवा इतर माध्यमांतून पसरवल्या जाणाऱ्या कोणत्याही अफवांवर विश्वास ठेवू नका.”
नगरसेविका सौ. निशाताई परुळेकर यांनी या बैठकीचे आयोजन करून रहिवाशांच्या मागण्या आक्रमकपणे मांडल्या. पांडेनगरमधील प्रत्येक घराला आणि कुटुंबाला न्याय मिळावा, ही आमची प्राथमिकता असल्याचे त्यांनी नमूद केले. रहिवाशांच्या सुख-दुःखात आम्ही सदैव सोबत असून हा प्रश्न निकाली लावण्यासाठी शेवटपर्यंत लढा देऊ, असा विश्वासही त्यांनी यावेळी व्यक्त केला.
या महत्त्वपूर्ण बैठकीच्या शेवटी, श्री समर्थ कृपा रहिवाशी सेवा संघाच्या आजी-माजी कमिटीने आजवर केलेल्या सामाजिक कार्याचे कौतुक करण्यात आले. आमदार प्रवीण दरेकर यांच्या हस्ते कमिटी सदस्यांचा विशेष सत्कार करण्यात आला. रहिवाशांच्या समस्या सोडवण्यासाठी ही कमिटी करत असलेले प्रयत्न कौतुकास्पद असल्याचे दरेकर यांनी यावेळी सांगितले.
या प्रसंगी पांडेनगर परिसरातील शेकडो रहिवासी, श्री समर्थ कृपा रहिवाशी सेवा संघाचे पदाधिकारी आणि कार्यकर्ते मोठ्या संख्येने उपस्थित होते. आमदार प्रवीण दरेकर यांच्या आश्वासनामुळे पांडेनगरमधील रहिवाशांमध्ये आनंदाचे आणि समाधानाचे वातावरण पाहायला मिळत आहे.
