भाजीपाला कडाडला! तापमान आणि इंधन दरवाढीमुळे भाज्यांचे दर गगनाला!

मुंबई : निर्भीड समाचार वृत्तसेवा

वाढता उन्हाचा पारा आणि वाहतूक खर्चामध्ये (इंधन दरवाढ) झालेली मोठी वाढ यामुळे राज्यातील भाजीपाल्याचे दर गगनाला भिडले आहेत. घाऊक आणि किरकोळ बाजारात भाज्यांची आवक घटल्याने दरांमध्ये तब्बल ४० ते ६० टक्क्यांची वाढ झाली आहे. यामुळे आधीच महागाईने होरपळणाऱ्या सर्वसामान्य नागरिकांच्या खिशाला आता चांगलीच फोडणी बसत आहे. गृहिणींचे बजेट पूर्णपणे कोलमडले असून, बाजारात भाजी खरेदी करताना सर्वसामान्यांच्या डोळ्यात पाणी येत आहे.राज्यातील प्रमुख बाजार समित्यांमध्ये (APMC) सध्या भाजीपाल्याची आवक कमालीची घटली असून, आगामी काळात दर आणखी वाढण्याची शक्यता व्यापाऱ्यांनी वर्तवली आहे.

भाजीपाला महागण्याची प्रमुख कारणे

1. भीषण तापमान आणि पाण्याची टंचाई: उन्हाळ्याचा कडक उन्हाचा पारा आणि अनेक भागांत निर्माण झालेली पाण्याची टंचाई यामुळे भाजीपाल्याचे उत्पादन मोठ्या प्रमाणावर घटले आहे. शेतातील पिके उन्हामुळे जळून खाक होत आहेत, ज्यामुळे बाजारात येणारा माल कमी झाला आहे.

2. इंधन दरवाढ आणि वाहतूक खर्च: डिझेलच्या दरांमध्ये झालेल्या वाढीमुळे ग्रामीण भागातून शहरात भाजीपाला आणणारा वाहतूक खर्च (Transportation Cost) प्रचंड वाढला आहे. हा वाढलेला खर्च अंतिमतः ग्राहकांच्या खिशाकडून वसूल केला जात आहे.

पाहा काय आहेत भाज्यांचे वाढलेले दर (प्रति किलो – किरकोळ बाजार)बाजारात सध्या जवळपास सर्वच भाज्यांनी शंभरी पार केली आहे. खालील तक्त्यावरून वाढलेल्या दरांचा अंदाज येईल:

बाजारात सध्या सर्वच भाजीपाल्याने शंभरी पार केली असून किरकोळ बाजारात भाज्यांचे दर प्रचंड वाढले आहेत. काल-परवापर्यंत १५ ते २० रुपयांना मिळणारी कोथिंबीरची एक जुडी आता चक्क ६० ते ८० रुपयांना विकली जात आहे, तर मेथीच्या एका जुडीचा दर ५० ते ६० रुपयांवर पोहोचला आहे. रोजच्या जेवणात लागणारा टोमॅटो आता ३० रुपयांवरून थेट ६० ते ८० रुपये प्रति किलो झाला आहे. याशिवाय फ्लॉवर आणि भेंडी ८० ते १०० रुपये किलोने विकली जात असून, सिमला मिरची ९० व गवार १०० ते १२० रुपये किलोवर पोहोचली आहे. हॉटेल आणि घरांमध्ये आवडीने खाल्ली जाणारी फरसबी (बीन्स) आता १२० ते १४० रुपये किलो झाली आहे. तिखट मिरची आणि आल्याने तर ग्राहकांना चांगलाच झटका दिला असून, हिरवी मिरची १२० से १५० रुपये आणि आले (अद्रक) थेट २०० ते २४० रुपये प्रति किलो या विक्रमी दराने विकले जात आहे.

पालेभाज्यांची आवक निम्म्यावर; कोथिंबीर आणि मेथी भाव खाऊन
उन्हाचा सर्वाधिक फटका पालेभाज्यांना बसला आहे. शेतात पाणी नसल्यामुळे कोथिंबीर, मेथी, शेपू आणि पालक यांसारख्या पालेभाज्या सुकू लागल्या आहेत. त्यामुळे बाजारात चांगल्या दर्जाच्या पालेभाज्यांची आवक निम्म्यावर आली आहे. काल-परवापर्यंत १५ ते २० रुपयांना मिळणारी कोथिंबीरची एक जुडी आता चक्क ६० ते ८० रुपयांना विकली जात आहे. मेथीचे दरही गगनाला भिडले आहेत.

हॉटेल चालक आणि केटरर्सही चिंतेत
भाजीपाल्याची ही दरवाढ केवळ घरगुती बजेट पुरती मर्यादित राहिलेली नाही. हॉटेल व्यावसायिक, खानावळी आणि लग्नकार्याचे केटरर्स यांचेही गणित यामुळे पूर्णपणे बिघडले आहे. भाज्यांचे दर दुप्पट झाल्यामुळे हॉटेलमधील थाळी आणि भाज्यांचे दर वाढवण्याशिवाय त्यांच्याकडे दुसरा पर्याय उरलेला नाही. “लग्नाचा सीझन सुरू असल्याने भाज्यांची गरज जास्त आहे, पण वाढलेल्या दरांमुळे नफा कमावणे कठीण झाले आहे,” असे एका केटरिंग व्यावसायिकाने सांगितले.

व्यापाऱ्यांचे काय म्हणणे आहे?
मुंबईच्या वाशी मार्केट आणि पुण्याच्या मार्केट यार्डातील व्यापाऱ्यांच्या मते, “दरवर्षी उन्हाळ्यात आवक कमी होते, पण यंदा कडक ऊन आणि इंधन दरवाढीचा दुहेरी फटका बसला आहे. वाहतूकदार आता जास्त भाडे मागत आहेत. जोपर्यंत नवीन पावसाळी पिकांची आवक सुरू होत नाही, तोपर्यंत भाज्यांचे दर चढेच राहण्याची शक्यता आहे.

सर्वसामान्यांची प्रतिक्रिया
“आधीच गॅस सिलेंडर, डाळी आणि तेलाचे दर वाढलेले आहेत. त्यात आता रोज लागणारा भाजीपालाही महागल्याने जगायचे कसे, हा प्रश्न आहे. १०० रुपये घेऊन बाजारात गेले तर पिशवीत फक्त दोन-तीन भाज्याच येतात,” अशी संतप्त प्रतिक्रिया एका गृहिणीने दिली.