“कारभारी लयभारी” फेम अनुष्का-निखिल अडकले लग्नबंधनात!
मुंबई : निर्भीड समाचार वृत्तसेवा
मराठी टेलिव्हिजन विश्वातील चाहत्यांसाठी एक अत्यंत आनंदाची आणि गोड बातमी समोर आली आहे. झी मराठी वाहिनीवरील लोकप्रिय मालिका ‘कारभारी लयभारी’ मधून प्रेक्षकांच्या मनावर राज्य करणारी मुख्य जोडी, म्हणजेच अभिनेत्री अनुष्का सरकटे आणि अभिनेता निखिल चव्हाण आता खऱ्या आयुष्यातही एकमेकांचे जीवनसाथी बनले आहेत. गेल्या अनेक दिवसांपासून या दोघांच्या लग्नाची चर्चा सोशल मीडियावर रंगत होती. अखेर २४ जून रोजी छत्रपती संभाजीनगर (औरंगाबाद) येथे कुटुंबीय, नातेवाईक आणि जवळच्या मित्रपरिवाराच्या उपस्थितीत हा शाही विवाहसोहळा अत्यंत पारंपरिक पद्धतीने पार पडला. या आनंदाच्या सोहळ्यात सर्वात जास्त चर्चा रंगली ती म्हणजे अनुष्काच्या वडिलांनी आपला लाडका जावई निखिलला दिलेल्या एका अत्यंत खास आणि महागड्या सरप्राइज गिफ्टची!
जावई माझा लाडका! लग्नापूर्वीच मिळाली ‘BMW’ कार
निखिल चव्हाण हा सरकटे कुटुंबाचा जावई होणार असल्याने लग्नाआधीपासूनच त्याचे सासरच्या मंडळींकडून प्रचंड कौतुक आणि लाड केले जात होते. यादरम्यान हळद आणि संगीत सोहळ्याच्या पूर्वी अनुष्काच्या वडिलांनी निखिलला एक अनोखे सरप्राइज दिले. त्यांनी आपल्या लाडक्या जावयाला एक नवीकोरी, पांढऱ्या रंगाची आलिशान BMW कार भेट म्हणून दिली. निखिल आणि अनुष्का यांनी या नव्या गाडीसोबतचा एक गोड फोटो सोशल मीडियावर चाहत्यांसोबत शेअर केला आहे. “नव्या आयुष्याची सुरुवात नव्या गाडीने करतोय.. तुमचे प्रेम आणि आशीर्वाद कायम असू द्या,” असे भावनिक कॅप्शन लिहीत त्यांनी ही आनंदाची बातमी दिली. या महागड्या गिफ्टची आणि सरकटे कुटुंबाच्या जावईप्रेमाची चर्चा सध्या संपूर्ण मराठी मनोरंजन विश्वात तुफान रंगत आहे.
हातात भगवा झेंडा आणि डोक्यावर तुळस; लग्नमंडपातील अनोखी एन्ट्री
अनुष्का आणि निखिलच्या लग्नसोहळ्याचे फोटो आणि व्हिडिओ सोशल मीडियावर प्रचंड व्हायरल होत आहेत. त्यांच्या लग्नाची एन्ट्री ही इतर सेलिब्रिटींपेक्षा अत्यंत वेगळी आणि लक्षवेधी ठरली. छत्रपती संभाजीनगरमधील लग्नमंडपात प्रवेश करताना निखिलने हातात ‘भगवा झेंडा’ घेतला होता, तर अनुष्काने डोक्यावर ‘तुळशी वृंदावन’ (तुळस) घेतली होती. या पारंपरिक आणि संस्कृती जपणाऱ्या एन्ट्रीने लग्नाला उपस्थित असलेल्या सर्वांचीच मने जिंकून घेतली.
पारंपरिक लूकमध्ये जोडपे दिसले राजबिंडे
आपल्या आयुष्यातील या सर्वात अनमोल क्षणासाठी अनुष्का सरकटे हिने गडद रंगाची सुंदर ‘नऊवारी साडी’ परिधान केली होती, ज्यामध्ये तिचे सौंदर्य खुलून दिसत होते. गळ्यात पारंपरिक दागिने, नाकात नथ आणि कपाळावर चंद्रकोर अशा मराठमोळ्या लूकमध्ये ती अतिशय सुंदर दिसत होती. तर दुसरीकडे, अभिनेता निखिल चव्हाण याने देखील पारंपरिक पांढऱ्या रंगाचे धोतर आणि कुर्ता परिधान केला होता, ज्यामध्ये तो अगदी राजबिंडा दिसत होता.
५ वर्षांपूर्वी ‘अशी’ सुरू झाली होती लव्हस्टोरी!
संगीत कार्यक्रमादरम्यान अनुष्काने तिच्या आणि निखिलच्या प्रेमकहाणीचा एक रंजक किस्सा प्रेक्षकांसोबत शेअर केला. तिने सांगितले, “आमच्या मैत्रीला आता ५ वर्षे पूर्ण झाली आहेत. लॉकडाऊनच्या काळात ‘कारभारी लयभारी’ मालिकेच्या शूटिंगदरम्यान आम्ही एकमेकांच्या जवळ आलो आणि आमच्यात संवाद सुरू झाला. निखिल माझ्यापेक्षा जास्त माझ्या वडिलांशी फोनवर बोलायचा. कारण मी एका शोमध्ये म्हटले होते की, माझे बाबा ज्या मुलाच्या डोक्यावर हात ठेवतील, मी त्याच्याशीच लग्न करेन. त्यामुळे निखिलने आधी माझ्या बाबांचे मन जिंकले.” निखिलने देखील हसत दाद दिली की, “माझ्यावर केवळ बाबांनीच नाही, तर पूर्ण सरकटे कुटुंबाने प्रेमाचा हात ठेवला आहे.
‘लागिरं झालं जी’ आणि मराठी कलाकारांची मांदियाळी
या ग्रँड विवाहसोहळ्याला मराठी चित्रपट आणि मालिका विश्वातील अनेक दिग्गज कलाकारांनी हजेरी लावली होती. विशेषतः निखिल चव्हाण याला ज्या मालिकेने ओळख मिळवून दिली, त्या ‘लागीरं झालं जी’ मालिकेची संपूर्ण टीम आपल्या लाडक्या मित्राच्या लग्नासाठी खास उपस्थित होती. अभिनेत्री शिवानी बावकर देखील आपल्या या मानलेल्या भावाच्या लग्नात सर्व विधींमध्ये हिररीने पुढे खेळताना दिसली. याशिवाय मनोरंजन क्षेत्रातील अनेक सहकलाकारांनी सोशल मीडियाच्या माध्यमातून या नवदाम्पत्यावर भरभरून शुभेच्छांचा वर्षाव केला आहे.
रील लाईफमध्ये कमालीची केमिस्ट्री दाखवणारी ही ‘कारभारी लयभारी’ जोडी आता रिअल लाईफमध्ये एकत्र आल्यामुळे त्यांचे लाखो चाहते कमालीचे खुश आहेत.
