तासगावचे जवान विशाल घोडके यांचे कानपूरमध्ये निधन!

मुंबई/तासगाव : निर्भीड समाचार वृत्तसेवा

देशसेवेत कार्यरत असताना तासगाव तालुक्यातील वायफळे येथील भारतीय सैन्य दलातील जवान विशाल सदाशिव घोडके (वय ३२) यांचे शनिवार दि. १६ मे रोजी कानपूर (उत्तर प्रदेश) येथे आकस्मिक निधन झाले. कर्तव्य बजावत असतानाच त्यांची प्राणज्योत मालवल्याने, त्यांच्या जाण्याने वायफळे गावासह संपूर्ण तासगाव तालुक्यावर आणि सांगली जिल्ह्यावर शोककळा पसरली आहे. एका उमद्या आणि देशभक्त जवानाच्या अकाली जाण्याने सर्वत्र हळहळ व्यक्त होत आहे.

लहानपणापासूनच देशसेवेचे स्वप्न
जवान विशाल घोडके हे लहानपणापासूनच अत्यंत सुस्वभावी, कष्टाळू आणि देशप्रेमाने भारावलेले व्यक्तिमत्त्व होते. मातृभूमीचे रक्षण करण्यासाठी सैन्य दलात भरती व्हायचे, हे त्यांचे बालपणापासूनचे स्वप्न होते. यासाठी त्यांनी कठोर परिश्रम घेतले होते. वयाच्या अवघ्या ३२ व्या वर्षी त्यांनी देशासाठी सेवा बजावताना अखेरचा श्वास घेतला. त्यांच्या या आकस्मिक निधनाची बातमी शनिवारी रात्री वायफळे गावात पोहोचताच संपूर्ण गावावर दुःखाचा डोंगर कोसळला. गावकऱ्यांनी स्वतःहून गावातील सर्व व्यवहार बंद ठेवून या वीरपुत्राला आदरांजली वाहिली.

घोडके कुटुंबाला देशसेवेची मोठी परंपरा
विशाल घोडके यांना देशसेवेचे बाळकडू घरातूनच मिळाले होते. त्यांच्या कुटुंबाला सैनिकी सेवेची एक मोठी आणि अभिमानास्पद परंपरा लाभली आहे. विशाल यांचे वडील सदाशिव घोडके यांनीही भारतीय सैन्य दलात अनेक वर्षे सेवा करून देशाचे रक्षण केले आहे. वडिलांच्या पावलावर पाऊल ठेवत विशाल यांचे मोठे बंधू विनोद घोडके हे देखील गेल्या अनेक वर्षांपासून सैन्य दलात कार्यरत असून सध्या देशाची सेवा करत आहेत. वडिलांनंतर दोन्ही मुलांनीही देशसेवेचा मार्ग निवडल्यामुळे घोडके कुटुंबाचा वायफळे परिसरात मोठा मान आहे. अशा देशभक्त कुटुंबातील तरुण जवान विशाल यांच्या निधनाने परिसराचे कधीही न भरून निघणारे मोठे नुकसान झाले आहे.

कानपूर येथे कर्तव्य बजावताना घेतला अंतिम श्वास
जवान विशाल घोडके हे सध्या उत्तर प्रदेशातील कानपूर येथे सैन्य दलात आपली सेवा बजावत होते. शनिवारी duty वर असतानाच त्यांची अचानक तब्येत बिघडली आणि त्यांचे आकस्मिक निधन झाले. सैन्य दलातील वरिष्ठ अधिकाऱ्यांनी या घटनेची माहिती तातडीने त्यांच्या कुटुंबीयांना दिली. ही बातमी ऐकताच घोडके कुटुंबासह त्यांच्या नातेवाईकांना मोठा धक्का बसला. विशाल यांच्या पश्चात वृद्ध माता-पिता, पत्नी, लहान मुले आणि मोठा भाऊ असा परिवार आहे.

शासकीय इतमामात होणार अंत्यसंस्कार
जवान विशाल घोडके यांचे पार्थिव कानपूर येथून विशेष विमानाने आणि त्यानंतर वाहनाने त्यांच्या मूळ गावी वायफळे येथे आणण्यात येणार आहे. त्यांच्यावर वायफळे येथील निवासस्थानाजवळ शासकीय इतमामात आणि लष्करी इतमामात अंत्यसंस्कार केले जाणार आहेत. या वीरपुत्राला अंतिम निरोप देण्यासाठी प्रशासनाकडून तयारी सुरू असून, संपूर्ण तासगाव तालुक्यातील नागरिक आणि आजी-माजी सैनिक वायफळे गावाकडे येत आहेत. देशसेवेचे व्रत अखंडपणे जपणा-या घोडके कुटुंबातील या तरुण जवानाच्या निधनाने संपूर्ण सांगली जिल्हा शोकाकुल झाला आहे