‘झेन स्पा’वर छापा; देहव्यापारप्रकरणी महिला चालकाला अटक!
मुंबई/पिंपळे निलख: निर्भीड समाचार वृत्तसेवा
आयटी हब म्हणून ओळखल्या जाणाऱ्या हिंजवडी आणि वाकड परिसरात स्पा सेंटरच्या नावाखाली अनैतिक व्यवसाय चालवणाऱ्या केंद्रांवर पिंपरी-चिंचवड पोलिसांनी आपली पकड घट्ट केली आहे. विशालनगर, पिंपळे निलख परिसरातील एका नामांकित स्पा सेंटरमध्ये सुरू असलेल्या देहव्यापाराच्या अड्ड्यावर गुन्हे शाखेच्या अनैतिक मानवी वाहतूक प्रतिबंध कक्षाने (AHTU) धडक कारवाई केली. या छाप्यात दोन हताश महिलांची या दलालांच्या विळख्यातून सुटका करण्यात आली, तर अनैतिक मानवी वाहतूक केल्याप्रकरणी एका ३४ वर्षीय महिला चालकाला पोलिसांनी रंगेहात अटक केली आहे.
‘झेन स्पा’ मध्ये सुरू होता काळा धंदा
पोलिसांनी दिलेल्या माहितीनुसार, वाकड-हिंजवडी रोडवर विशालनगर (पिंपळे निलख) भागात ‘झेन स्पा’ (ZEN SPA) नावाचे केंद्र चालवले जात होते. बाहेरून सर्वसामान्य स्पा सेंटर भासणाऱ्या या केंद्राच्या आत मात्र ग्राहकांना आकर्षित करून वेश्याव्यवसाय करून घेतला जात होता. या अवैध व्यवसायाची माहिती गुन्हे शाखेच्या अनैतिक मानवी वाहतूक प्रतिबंध कक्षाला गुप्त बातमीदारामार्फत मिळाली होती.माहिती मिळताच पोलिसांनी तात्काळ वरिष्ठांच्या मार्गदर्शनाखाली पथक तयार केले. स्पा सेंटरमध्ये खरोखरच असा प्रकार चालतो की नाही, हे तपासण्यासाठी पोलिसांनी प्रथम एका बनावट ग्राहकाला (डिकॉय कस्टमर) तिथे पाठवले.
डिकॉय कस्टमर पाठवून रचला सापळा
पोलिसांच्या योजनेनुसार, बनावट ग्राहकाने ‘झेन स्पा’ मध्ये जाऊन तेथील व्यवस्थापक आणि महिला मालकिणीशी संपर्क साधला. पैशांचे व्यवहार पूर्ण झाल्यानंतर आणि तिथे अनैतिक मानवी व्यापार सुरू असल्याची खात्री पटताच, बनावट ग्राहकाने बाहेर दबा धरून बसलेल्या पोलिसांच्या पथकाला इशारा केला.इशारा मिळताच गुन्हे शाखेच्या पथकाने स्पा सेंटरवर अचानक धाड टाकली. या कारवाईदरम्यान स्पाच्या आतील खोलीतून दोन पीडित महिलांची सुटका करण्यात आली. आरोपी महिला स्वाती सत्यदेव खंदारे (वय ३४, रा. पुनावळे) हिला पोलिसांनी घटनास्थळावरूनच ताब्यात घेतले.
पैशांचे आमिष दाखवून महिलांचे शोषण
पोलीस तपासात अत्यंत धक्कादायक माहिती समोर आली आहे. आरोपी स्वाती खंदारे ही गरीब आणि गरजू महिलांना हेरून त्यांना जास्त पैशांचे आमिष दाखवायची. त्यानंतर त्यांना या अनैतिक व्यवसायाच्या दलदलीत ओढले जात असे. पीडित महिलांकडून जबरदस्तीने वेश्याव्यवसाय करून घेतला जात होता आणि त्यातून मिळणाऱ्या पैशांवर आरोपी स्वाती स्वतःची आलिशान उपजीविका चालवत होती.विशेष म्हणजे, ज्या परिसरात हे स्पा सेंटर सुरू होते, त्याच्या अगदी जवळच नागरिकांची वर्दळ असणारी सार्वजनिक ठिकाणे आणि धार्मिक स्थळे आहेत. अशा अत्यंत संवेदनशील आणि रहिवासी भागात हा काळा धंदा राजरोसपणे सुरू असल्याने स्थानिक नागरिकांमधूनही तीव्र संताप व्यक्त होत आहे.
वाकड पोलीस ठाण्यात गुन्हा दाखल
या कारवाईनंतर पोलिसांनी पीडित महिलांची सुटका करून त्यांची रवानगी सुधारगृहात केली आहे. आरोपी स्वाती खंदारे हिच्याविरुद्ध वाकड पोलीस ठाण्यात गुन्हा क्रमांक २८४/२०२६ अन्वये गुन्हा दाखल करण्यात आला आहे. तिच्यावर नवीन कायद्यानुसार भारतीय न्याय संहिता (BNS) २०२३ चे कलम १४३(३) (मानवी तस्करी) तसेच अनैतिक मानवी व्यापार प्रतिबंध कायदा १९५६ (PITA) च्या विविध कलमांनुसार कायदेशीर कारवाई करण्यात आली आहे.
पिंपरी-चिंचवड गुन्हे शाखेच्या अनैतिक मानवी वाहतूक प्रतिबंध कक्षाने ही यशस्वी कारवाई केली असून, या रॅकेटमध्ये आणखी कोणाचा सहभाग आहे का, याचा पुढील तपास वाकड पोलीस करत आहेत.
