विचारांचे स्वराज्य! ‘स्वराज्य मित्र मंडळा’चा २५ वर्षांपासून समाजप्रबोधनाचा अखंड वारसा.

कांदिवली/मुंबई : निर्भीड समाचार News Desk

महाराष्ट्रात गणेशोत्सव आणि शिवजयंती हे सण उत्साहाने साजरे होतातच, पण या उत्सवांना समाजप्रबोधनाची जोड देऊन एक पिढी घडवण्याचे कार्य ‘स्वराज्य मित्र मंडळ’ गेल्या २५ वर्षांपासून करत आहे. सन २००० मध्ये एका छोट्या रोपट्याच्या स्वरूपात सुरू झालेल्या या मंडळाचे आज एका वटवृक्षात रूपांतर झाले असून, यंदा हे मंडळ आपल्या सामाजिक कार्याचा रौप्यमहोत्सवी (२५ वर्षे) टप्पा साजरा करत आहे. केवळ ढोल-ताशांच्या गजरात उत्सव साजरा न करता, समाजात विचारांची पेरणी कशी करावी, याचा आदर्श ‘स्वराज्य मित्र मंडळा’ने गेल्या २५ वर्षांत घालून दिला आहे. सन २००० मध्ये स्थापन झालेल्या या मंडळाने यंदा आपल्या सामाजिक कार्याचा रौप्यमहोत्सवी टप्पा पार केला असून, शिवजयंतीच्या माध्यमातून समाजप्रबोधनाचा नवा अध्याय सुरू केला आहे.

स्वराज्य मित्र मंडळाचा मुख्य उद्देश केवळ उत्सव साजरा करणे नसून, समाजातील शेवटच्या घटकापर्यंत परिवर्तन पोहोचवणे हा आहे. गेल्या अडीच दशकांत मंडळाने विविध ज्वलंत विषयांवर जनजागृती केली आहे. यामध्ये ‘जय जवान जय किसान’ पासून ते ‘डिजिटल भारत’ आणि ‘महिला सक्षमीकरणा’पर्यंतच्या विषयांचा समावेश आहे.मंडळाने आजवर महाराष्ट्राची संत परंपरा, स्वराज्यासाठी बलिदान देणारे शिलेदार आणि युवकांची सामाजिक जबाबदारी या विषयांवर व्याख्याने, प्रदर्शने आणि उपक्रमांच्या माध्यमातून प्रकाश टाकला आहे. “विचार जागर, समाज परिवर्तन आणि महाराष्ट्र प्रथम” हा मंत्र घेऊन मंडळाने हजारो युवकांना योग्य दिशा देण्याचे काम केले आहे.

डिजिटल युगाचे महत्त्व ओळखून, आता स्वराज्याचे विचार आणि सामाजिक जाणीव अधिकाधिक युवकांपर्यंत पोहोचवण्यासाठी मंडळाने सोशल मीडियाच्या माध्यमातून सक्रिय होण्याचा संकल्प केला आहे. या प्रवासात जास्तीत जास्त नागरिकांनी सहभागी व्हावे, असे आवाहन मंडळाच्या वतीने करण्यात आले आहे.