विजयच्या भाषणाने तृषा कृष्णन भावूक; शपथविधीतील व्हिडिओ व्हायरल!
मुंबई/चेन्नई: निर्भीड समाचार वृत्तसेवा
तमिळनाडूच्या राजकारणात रविवारी एका नव्या युगाची पहाट झाली. लोकप्रिय अभिनेता आणि ‘तमिळगा वेत्री कझगम’ (TVK) पक्षाचे संस्थापक सी. जोसेफ विजय यांनी राज्याचे मुख्यमंत्री म्हणून अधिकृतपणे शपथ घेतली. चेन्नईच्या जवाहरलाल नेहरू इंडोर स्टेडियममध्ये आयोजित या दिमाखदार सोहळ्यात राज्यपाल राजेंद्र विश्वनाथ आर्लेकर यांनी विजय यांना पद आणि गोपनीयतेची शपथ दिली. गेल्या ६० वर्षांपासून तमिळनाडूच्या राजकारणात असलेल्या ‘द्रविडियन’ वर्चस्वाला छेद देत विजय यांनी सत्ता स्थापन केली आहे.
दिमाखदार शपथविधी सोहळारविवारी सकाळी १० वाजता हा भव्य सोहळा पार पडला. स्टेडियममध्ये हजारो चाहत्यांनी आणि समर्थकांनी आपल्या लाडक्या ‘थलपती’ला मुख्यमंत्री होताना पाहण्यासाठी मोठी गर्दी केली होती. यावेळी विजय यांचे वडील एस. ए. चंद्रशेखर आणि आई शोभा चंद्रशेखर उपस्थित होते. या ऐतिहासिक क्षणी राजकीय नेत्यांसोबतच चित्रपटसृष्टीतील अनेक दिग्गजही सहभागी झाले होते, ज्यात काँग्रेस नेते राहुल गांधी यांचा प्रामुख्याने समावेश होता.
तृषा कृष्णन ठरली आकर्षणाचे केंद्रया संपूर्ण सोहळ्यात सर्वांच्या नजरा मात्र दक्षिण भारतीय चित्रपटसृष्टीतील आघाडीची अभिनेत्री तृषा कृष्णन हिच्यावर खिळल्या होत्या. निळ्या रंगाच्या रेशमी साडीत पारंपारिक लूकमध्ये आलेल्या तृषाने सोहळ्याची शोभा वाढवली. ‘लिओ’ आणि ‘घिल्ली’ सारख्या सुपरहिट चित्रपटांमधील विजयची सहकलाकार असलेली तृषा या खास प्रसंगी विजयचे समर्थन करण्यासाठी सर्वात समोरच्या रांगेत बसलेली दिसली. तिने विजयच्या आईची भेट घेऊन त्यांचे अभिनंदनही केले, ज्याचे व्हिडिओ सोशल मीडियावर प्रचंड व्हायरल होत आहेत.
मुख्यमंत्री होताच मोठे निर्णयशपथ घेतल्यानंतर विजय यांनी तातडीने प्रशासकीय कामाला सुरुवात केली. त्यांनी शपथविधीच्या मंचावरूनच जनहितार्थ तीन महत्त्वाच्या फायलींवर स्वाक्षरी केली:
१. मोफत वीज: घरगुती वापरासाठी २०० युनिटपर्यंत मोफत वीज देण्याचा निर्णय
२. महिला सुरक्षा: महिलांच्या सुरक्षेसाठी राज्यात ‘सिंगा पेन’ नावाचे विशेष सुरक्षा दल स्थापन करणार.
३. अमली पदार्थमुक्त राज्य: अंमली पदार्थांच्या विरोधात कारवाई करण्यासाठी स्वतंत्र टास्क फोर्सची निर्मिती.
“मी तुमच्यातीलच एक..”मुख्यमंत्री म्हणून आपल्या पहिल्या भाषणात विजय भावूक झाले होते. “मी कोणत्याही राजघराण्यातून आलेलो नाही, तर एका सामान्य कुटुंबातून इथपर्यंत पोहोचलो आहे. लोकांनी मला स्वीकारलं, हेच माझं यश आहे,” अशा शब्दांत त्यांनी जनतेचे आभार मानले. तसेच, राज्यात खऱ्या अर्थाने धर्मनिरपेक्ष आणि सामाजिक न्यायाचे सरकार चालवणार असल्याचे आश्वासन त्यांनी दिले.
राजकीय क्रांतीची नांदी२०२६ च्या विधानसभा निवडणुकीत विजय यांच्या TVK पक्षाने आणि मित्रपक्षांनी मिळून १२८ जागा जिंकून बहुमत मिळवले आहे. तमिळनाडूच्या राजकारणात डीएमके (DMK) आणि एआयएडीएमके (AIADMK) या दोन पारंपरिक पक्षांना बाजूला सारून एखाद्या तिसऱ्या पक्षाने सरकार बनवण्याची ही पहिलीच वेळ आहे. या विजयामुळे तमिळनाडूच्या राजकारणाला नवी दिशा मिळण्याची शक्यता राजकीय विश्लेषकांनी वर्तवली आहे.विजय यांच्या या ऐतिहासिक प्रवासाने केवळ चित्रपटसृष्टीच नव्हे, तर संपूर्ण देश पुन्हा एकदा थक्क झाला आहे.
