होर्मुझमध्ये जहाजावर हल्ला; पुणेकर मरीन इंजिनिअरचा मृत्यू!
मुंबई : निर्भीड समाचार वृत्तसेवा
होर्मुझच्या सामुद्रधुनीमध्ये ‘एमव्ही जीएफएस गॅलेक्सी’ (MV GFS Galaxy) या व्यापारी जहाजावर झालेल्या भीषण क्षेपणास्त्र हल्ल्यात पुण्यातील मरीन इंजिनिअर हेरंब करमरकर यांचा दुर्दैवी आणि करुण अंत झाला आहे. जहाजावर थर्ड इंजिनिअर म्हणून कार्यरत असलेल्या हेरंब यांचा मृतदेह इंजिन रूमजवळ सापडला असून, त्यांच्या निधनाची माहिती मिळताच संपूर्ण पुणे शहरावर आणि मर्चंट नेव्ही वर्तुळावर शोककळा पसरली आहे.
शेवटचा संपर्क आणि सुखरूप पार केल्याचे आश्वासनहेरंब करमरकर हे गेल्या तीन महिन्यांहून अधिक काळ समुद्रात ड्युटीवर होते आणि लवकरच सुट्टीवर भारतात परतणार होते. रविवारी मध्यरात्रीनंतर (१२ जुलै) होर्मुझची अत्यंत संवेदनशील सामुद्रधुनी पार करत असताना, हेरंब यांनी आंतरराष्ट्रीय वेळेनुसार पहाटे २:४९ वाजता पुण्यातील आपल्या कुटुंबाशी व्हॉट्सॲपवर शेवटचा संपर्क साधला होता.
“आम्ही सामुद्रधुनी सुखरूप पार केली आहे (Crossed the strait safely),” असा दिलासादायक संदेश त्यांनी आपल्या कुटुंबाला पाठवला होता. या संदेशानंतर कुटुंबाने सुटकेचा श्वास सोडला. मात्र, नियतीच्या मनात काही वेगळेच होते. हा संदेश पाठवल्यानंतर अवघ्या काही मिनिटांतच, म्हणजे पहाटे सुमारे ३:३० वाजता त्यांच्या जहाजाला लक्ष्य करण्यात आले.
ओमानच्या सागरी हद्दीत भीषण हल्ला आणि आग’एमव्ही जीएफएस गॅलेक्सी’ हे सायप्रस देशाच्या ध्वजाखालील मालवाहू जहाज ओमानच्या सागरी हद्दीतून जात असताना एका अज्ञात क्षेपणास्त्राने (Projectile) त्यावर थेट हल्ला केला. हा हल्ला थेट जहाजाच्या इंजिन रूमवर झाला, जिथे हेरंब ड्युटीवर तैनात होते. क्षेपणास्त्राच्या आघातामुळे इंजिन रूममध्ये प्रचंड मोठा स्फोट होऊन भीषण आग लागली.
आगीमुळे जहाजाची संपूर्ण नियंत्रण यंत्रणा (Propulsion) ठप्प झाली. जहाजावरील २४ कर्मचाऱ्यांपैकी ११ भारतीय होते. परिस्थिती हाताबाहेर गेल्याचे पाहून कॅप्टनने जहाज तिथेच नांगरले आणि सर्व कर्मचाऱ्यांना लाईफबोटच्या साहाय्याने जहाज सोडण्याचे (Abandon Ship) आदेश दिले.
बचाव मोहीम आणि हेरंब यांचा दुर्दैवी अंत: हल्ल्याची माहिती मिळताच ओमानच्या रॉयल नेव्हीने (Royal Navy of Oman) तातडीने युद्धपातळीवर बचाव मोहीम हाती घेतली. दोन तासांच्या अथक प्रयत्नांनंतर ओमान नौदलाने जहाजावरील २४ पैकी २३ कर्मचाऱ्यांना सुरक्षितपणे बाहेर काढले, ज्यामध्ये १० भारतीयांचा समावेश होता. मात्र, इंजिन रूममध्ये ड्युटीवर असलेले हेरंब करमरकर हे एकटेच बेपत्ता होते.
इंजिन रूममधील आग आटोक्यात आल्यानंतर शोध पथकाने आत प्रवेश केला, तेव्हा तिथे हेरंब यांचा मृतदेह जळालेल्या अवस्थेत आढळला. स्फोट आणि विषारी धुरामुळे त्यांचा जागीच मृत्यू झाल्याचा अंदाज वर्तवण्यात येत आहे. हेरंब यांचे निकटवर्तीय ऋषी टंडन यांनी प्रसारमाध्यमांशी बोलताना अधिकृत सूत्रांच्या हवाल्याने या दुःखद वृत्ताला दुजोरा दिला आहे.
आंतरराष्ट्रीय युद्धजन्य परिस्थितीचा फटका: सध्या मध्यपूर्वेमध्ये सुरू असलेल्या आंतरराष्ट्रीय तणावाचा आणि युद्धाचा मोठा फटका आंतरराष्ट्रीय व्यापारी जहाजांना बसत आहे. होर्मुझ सामुद्रधुनी हा जगातील सर्वात व्यस्त परंतु सध्या अत्यंत धोकादायक सागरी मार्ग बनला आहे. या भागात व्यापारी नौकांवर होणाऱ्या हल्ल्यांचा भारताने तीव्र शब्दांत निषेध केला आहे.
पार्थिव पुण्यात आणण्यासाठी प्रयत्न सुरू: हेरंब यांच्या निधनाची बातमी समजताच पुण्यातील त्यांच्या राहत्या घरी नातेवाईक आणि मित्रांनी गर्दी केली असून सर्वत्र हळहळ व्यक्त होत आहे. ओमानमध्ये मृतदेहाचे शवविच्छेदन (Postmortem) आणि कायदेशीर सोपस्कार पूर्ण झाल्यानंतर, त्यांचे पार्थिव कंपनीच्या माध्यमातून सुरक्षितपणे पुण्यात आणले जाईल, अशी माहिती त्यांच्या कुटुंबीयांनी दिली आहे. हेरंब यांच्या पश्चात पत्नी, लहान मूल आणि वृद्ध आई-वडील असा परिवार आहे. एका कर्तव्यदक्ष मराठी मरीन इंजिनिअरचा अशा प्रकारे युद्धजन्य परिस्थितीत अंत झाल्याने मर्चंट नेव्ही क्षेत्रातून तीव्र दुःख व्यक्त केले जात आहे.
