माझगावात गणपती मिरवणुकीवर अंडीफेक; प्रचंड तणाव

मुंबई : निर्भीड समाचार वृत्तसेवा

मुंबईतील माझगाव परिसरात रविवारी मध्यरात्रीच्या सुमारास एक धक्कादायक आणि संतापजनक घटना समोर आली आहे. ‘माझगावचा मोरया’ सार्वजनिक गणेशोत्सवाच्या बाप्पाची भव्य आगमन मिरवणूक सुरू असताना, एका इमारतीवरून मिरवणुकीवर अंडी फेकण्यात आल्याचा आरोप करण्यात आला आहे. या घटनेची माहिती वाऱ्यासारखी पसरताच गणेशभक्तांमध्ये तीव्र संताप उसळला आणि पाहता पाहता दोन गटांमध्ये जोरदार वाद होऊन झटापट झाली. परिस्थिती बिघडल्याने माझगाव परिसरात मोठ्या प्रमाणावर तणाव निर्माण झाला आहे.

आगामी गणेशोत्सवाच्या पार्श्वभूमीवर मुंबईत सध्या विविध मंडळांच्या बाप्पांच्या आगमन मिरवणुका मोठ्या उत्साहात काढल्या जात आहेत. मिळालेल्या माहितीनुसार, माझगाव परिसरातील एका प्रसिद्ध गणेश मंडळाची (मोरया गणपती) आगमन शोभायात्रा अत्यंत उत्साही आणि भक्तीमय वातावरणात मार्गक्रमण करत होती. मध्यरात्रीच्या सुमारास ही मिरवणूक एका इमारतीजवळून जात असताना, अचानक वरून मिरवणुकीच्या दिशेने अंडी फेकण्यात आली.मंडळाच्या पदाधिकाऱ्यांनी दिलेल्या माहितीनुसार, मुख्य मंडपापासून अवघ्या ३० ते ४० मीटर अंतरावर ही घृणास्पद घटना घडली. मिरवणुकीतील नागरिकांवर अंडी पडल्याचे लक्षात येताच कार्यकर्त्यांनी आणि स्थानिक गणेशभक्तांनी आक्रमक पवित्रा घेतला.

अंडी फेकल्याचा आरोप ज्या इमारतीवर आहे, त्या इमारतीबाहेर शेकडो हिंदू बांधव आणि गणेशभक्त एकत्र जमले. संतप्त जमावाने त्या इमारतीला वेढा घातला आणि जोरदार घोषणाबाजी सुरू केली. यावेळी परिसरात दुसऱ्या बाजूनेही लोक जमा झाले, ज्यामुळे दोन्ही बाजूंच्या लोकांमध्ये जोरदार बाचाबाची आणि वाद झाला. घटनेचे गांभीर्य वाढल्याने दोन्ही पक्षांमध्ये थेट चकमक आणि झटापटीची परिस्थिती निर्माण झाली. या गोंधळामुळे माझगावमधील वाहतूक आणि सामान्य जनजीवन काही काळ विस्कळीत झाले होते.

या संपूर्ण प्रकरणावर गणेश मंडळाच्या वतीने तीव्र शब्दांत निषेध नोंदवण्यात आला आहे. अखिल सार्वजनिक उत्सव समितीचे अध्यक्ष हितेश जाधव आणि मंडळाचे उपसचिव विवेक राणे यांनी माध्यमांशी बोलताना सांगितले की, “बाप्पाच्या आगमन सोहळ्याला गालबोट लावणारी ही घटना अत्यंत आक्षेपार्ह आणि निषेधार्ह आहे. आम्ही पोलिसांकडे दोषींवर तात्काळ कठोर कारवाई करण्याची मागणी केली आहे. यासाठी आम्ही प्रशासनाला २४ तासांचा अल्टिमेटम दिला असून, दोषींना अटक न केल्यास तीव्र आंदोलन छेडले जाईल.” या प्रकरणात सांस्कृतिक कार्यमंत्र्यांनीही मध्यस्थी करून योग्य कारवाईचे आश्वासन दिल्याचे आयोजकांनी सांगितले.

घटनेची माहिती मिळताच मुंबई पोलिसांचे वरिष्ठ अधिकारी आणि अतिरिक्त पोलीस कुमक तातडीने घटनास्थळी दाखल झाली. पोलिसांनी तात्काळ दोन्ही गटांतील लोकांना बाजूला सारत परिस्थिती आटोक्यात आणण्याचे प्रयत्न सुरू केले. सध्या माझगाव परिसरात मोठा पोलीस बंदोबस्त तैनात करण्यात आला असून राज्य राखीव पोलीस दलाच्या (SRPF) तुकड्यांनाही पाचारण करण्यात आले आहे.

पोलिसांनी नागरिकांना कोणत्याही अफवांवर विश्वास न ठेवण्याचे आणि शांतता राखण्याचे आवाहन केले आहे. तसेच, ज्या इमारतीवरून अंडी फेकल्याचा दावा केला जात आहे, त्या परिसरातील सर्व सीसीटीव्ही (CCTV) फुटेज पोलीस तपासत आहेत, जेणेकरून संशयितांची ओळख पटवून त्यांच्यावर कायदेशीर कारवाई करता येईल. याप्रकरणी पोलिसांनी गुन्‍याची नोंद करण्याचे काम सुरू केले आहे.