बांगलादेशात हिंदू कुटुंबातील ४ जणांची निर्घृण हत्या; चुलत भाऊ अटकेत
मुंबई : निर्भीड समाचार वृत्तसेवा
बांगलादेशातील रंगपूर परिसरातून माणुसकीला काळीमा फासणारी एक अत्यंत भयानक घटना उघडकीस आली आहे. येथे एकाच हिंदू कुटुंबातील चार जणांची अत्यंत क्रूरपणे हत्या करण्यात आली आहे. मृतांमध्ये एक सेवानिवृत्त शिक्षक, त्यांची पत्नी आणि दोन निष्पाप मुलांचा समावेश आहे. या सामूहिक हत्याकांडामुळे संपूर्ण परिसरात प्रचंड भीतीचे आणि तणावाचे वातावरण निर्माण झाले आहे. बांगलादेश पोलिसांनी या प्रकरणात वेगाने तपास करत मृतांच्या दोन चुलत भावांना संशयित म्हणून ताब्यात घेतले असून, त्यांनी चौकशीत हत्येची कबुली दिली आहे.
पोलिसांनी दिलेल्या माहितीनुसार, या भीषण हत्याकांडात जीव गमावलेल्यांची ओळख पटली आहे. सेवानिवृत्त शिक्षक गणपती चक्रवर्ती, त्यांची पत्नी प्रीतिलता, त्यांची तरुण मुलगी आगमी आणि त्यांचा १२ वर्षांचा लहान मुलगा प्रियम अशी मृतांची नावे आहेत. एकाच वेळी संपूर्ण कुटुंब संपवल्यामुळे स्थानिक हिंदू अल्पसंख्याक समाजात तीव्र संताप आणि सुरक्षेबाबत चिंता व्यक्त केली जात आहे.
पोलीस तपासात आणि आरोपींच्या चौकशीत अत्यंत धक्कादायक आणि थक्क करणारी माहिती समोर आली आहे. आरोपींनी चौघांची हत्या केल्यानंतर तात्काळ पळ काढला नाही. ते तब्बल ६ ते ७ तास त्याच रक्ताने माखलेल्या घरात लपून राहिले होते. या काळात त्यांनी अत्यंत निर्लज्जासारखे घरात बनवलेले अन्न खाल्ले, फ्रीजमधील काकडी (खीरा) आणि खजूर यांवर ताव मारला. इतकेच नव्हे तर, अंगाला लागलेले रक्ताचे डाग धुण्यासाठी त्यांनी त्याच घरात आरामात आंघोळ केली, कपडे बदलले आणि पहाटेच्या सुमारास तिथून फरार झाले. आरोपींच्या या क्रूर आणि निर्ढावलेल्या मानसिकतेमुळे पोलीस अधिकारीही चक्रावून गेले आहेत.
घटनेची माहिती मिळताच रंगपूर पोलिसांनी फॉरेन्सिक टीमसह घटनास्थळी धाव घेतली. संशयाच्या आधारे पोलिसांनी मृत गणपती चक्रवर्ती यांच्या दोन चुलत भावांना ताब्यात घेऊन त्यांची कसून चौकशी सुरू केली. सुरुवातीला उडवाउडवीची उत्तरे देणाऱ्या या दोन्ही आरोपींनी शेवटी पोलिसांच्या खाक्या दाखवताच आपला गुन्हा कबूल केला. कौटुंबिक वाद, मालमत्तेचा वाद किंवा पूर्ववैमनस्यातून ही हत्या झाली असण्याची प्राथमिक शक्यता पोलिसांनी वर्तवली आहे.
या घटनेनंतर बांगलादेशातील हिंदू संघटनांनी आणि स्थानिक नागरिकांनी रस्त्यावर उतरून तीव्र निषेध नोंदवला आहे. अल्पसंख्याक हिंदू कुटुंबांना लक्ष्य केले जात असल्याचा आरोप करत दोषींना तात्काळ फाशीची शिक्षा देण्याची मागणी केली जात आहे. पोलीस प्रशासनाने या प्रकरणाचा तपास जलदगतीने करण्यासाठी विशेष पथक तयार केले असून, हत्येमागील मुख्य सूत्रधार आणि इतर बाजूंचा शोध घेतला जात आहे.
