री-नीट २०२६ पूर्वी एनटीएचा मोठा निर्णय; विशेष पोर्टल सुरू!

मुंबई/ नवी दिल्ली : निर्भीड समाचार वृत्तसेवा

वैद्यकीय प्रवेशासाठी अत्यंत महत्त्वाची असलेल्या NEET UG 2026 पुनर्परीक्षेच्या (Re-Exam) पार्श्वभूमीवर राष्ट्रीय परीक्षा एजेंसीने (NTA) एक अत्यंत मोठे पाऊल उचलले आहे. २१ जून २०२६ रोजी होणाऱ्या या परीक्षेपूर्वी सोशल मीडियावरून पसरणाऱ्या पेपर लीकच्या खोट्या अफवा, तोतया उमेदवार (Impersonation) आणि फसव्या दाव्यांना आळा घालण्यासाठी एनटीएने केंद्र सरकारच्या सहकार्याने एक विशेष ऑनलाइन तक्रार पोर्टल थेट सुरू केले आहे. या अधिकृत पोर्टलच्या माध्यमातून विद्यार्थी, पालक आणि सामान्य नागरिक कोणत्याही संशयास्पद हालचालींची किंवा फसवणुकीची थेट तक्रार पुराव्यांसह करू शकणार आहेत.

१४ जून ते ३० जूनपर्यंत पोर्टल खुले; कुठे करायची तक्रार?
एनटीएने दिलेल्या माहितीनुसार, हे तक्रार निवारण पोर्टल MyGov India च्या सहकार्याने विकसित करण्यात आले असून ते १४ जून ते ३० जून २०२६ या कालावधीत तक्रार नोंदवण्यासाठी खुले असेल. विद्यार्थी किंवा नागरिक थेट अधिकृत लिंकवर (innovateindia.mygov.in/neet-ug-2026) जाऊन लॉग इन करू शकतात आणि परीक्षा प्रक्रियेला बाधा आणणाऱ्या कोणत्याही गैरप्रकाराची माहिती देऊ शकतात.

पोर्टलवर प्रामुख्याने कोणत्या गोष्टींची तक्रार करता येणार?
परीक्षेची पारदर्शकता आणि विश्वासार्हता टिकवून ठेवण्यासाठी एनटीएने पुढील ४ प्रमुख बाबींवर लक्ष केंद्रित केले असून, त्यांच्याशी संबंधित तक्रारी या पोर्टलवर स्वीकारल्या जातील:

1. पेपर लीकचे खोटे दावे: टेलिग्राम (Telegram), व्हॉट्सॲप (WhatsApp) किंवा इतर सोशल मीडियावर ‘री-नीटचा मूळ पेपर आमच्याकडे उपलब्ध आहे’ असा दावा करणाऱ्या चॅनेल्स किंवा ग्रुप्सची माहिती.

2. तोतया उमेदवार आणि एजंट: परीक्षेला बसणारे तोतया उमेदवार, तसेच पैशांच्या बदल्यात ‘१००% निवडीची हमी’ (Guaranteed Selection) देणारे रॅकेट किंवा बिचौलियांची तक्रार.

3. बनावट एनटीए अधिकारी: स्वतःला एनटीएचे अधिकारी, सरकारी प्रतिनिधी किंवा परीक्षा केंद्राचे कर्मचारी सांगून विद्यार्थ्यांची आर्थिक फसवणूक करण्याचा प्रयत्न करणाऱ्या व्यक्ती.

4. अफवा पसरवणारा मजकूर: विद्यार्थ्यांमध्ये भीती किंवा गोंधळाचे वातावरण निर्माण करणारे कोणतेही मेसेज किंवा बनावट नोटीस.

“कोणाकडेही आधी पेपर नाही!” – एनटीएचा कडक इशारा
एनटीएने आपल्या अधिकृत सूचनेत स्पष्ट शब्दांत सांगितले आहे की, “अफवांना तुमच्या नीट प्रवासाचा निर्णय घेऊ देऊ नका. परीक्षेपूर्वी कोणत्याही व्यक्तीकडे, संस्थेकडे किंवा व्यासपीठाकडे प्रश्नपत्रिका उपलब्ध नसते. जे लोक मूळ पेपर देण्याचा दावा करत आहेत, ते केवळ विद्यार्थ्यांच्या मानसिकतेचा गैरफायदा घेऊन पैसे उकळण्यासाठी खोट्या गोष्टी पसरवत आहेत.” केंद्रीय सायबर कायदा आणि पब्लिक एक्झामिनेशन (प्रिव्हेंशन ऑफ अनफेअर मींस) ॲक्ट, २०२४ च्या अंतर्गत अफवा पसरवणाऱ्यांवर कडक कायदेशीर कारवाई केली जाईल, असा इशाराही देण्यात आला आहे.

३ मे रोजीची परीक्षा का रद्द झाली होती?
देशभरातील विविध वैद्यकीय अभ्यासक्रमांच्या (MBBS, BDS इ.) प्रवेशासाठी मूळ नीट परीक्षा ३ मे २०२६ रोजी घेण्यात आली होती. मात्र, मोठ्या प्रमाणावर पेपर लीक आणि गैरप्रकार झाल्याचे समोर आल्यानंतर ही परीक्षा रद्द करण्यात आली. या प्रकरणाचा तपास केंद्रीय अन्वेषण विभागाकडे (CBI) सोपवला गेला असून, त्यांनी देशभरातून पेपर सेट करणारे आणि एजंट यांच्या मुसक्या आवळल्या आहेत.

आता २१ जून रोजी होणाऱ्या पुनर्परीक्षेसाठी सुरक्षेचे कडक नियम लागू केले असून, सुरक्षेचा उपाय म्हणून २२ जून २०२६ पर्यंत टेलिग्राम ॲप्लिकेशनच्या वापरावरही तात्पुरते निर्बंध घालण्यात आले आहेत.