कांतारा-तुंबाडला टक्कर; ‘या’ वेब सीरिजने उडवली प्रेक्षकांची झोप!

मुंबई : निर्भीड समाचार वृत्तसेवा

भारतीय चित्रपटसृष्टीत गेल्या काही वर्षांत ‘कांतारा’ (Kantara) आणि ‘तुंबाड’ (Tumbbad) सारख्या चित्रपटांनी केवळ बॉक्स ऑफिस गाजवले नाही, तर आपल्या अनोख्या आणि पारंपरिक कथानकाने प्रेक्षकांना खिळवून ठेवले. संस्कृती, रहस्य आणि थराराचा असाच एक अद्भुत संगम आता ओटीटी (OTT) प्लॅटफॉर्मवर पाहायला मिळत आहे. जर तुम्ही उत्कृष्ट दाक्षिणात्य चित्रपट आणि वास्तववादी वेब सीरिजचे चाहते असाल, तर झी५ (ZEE5) वर उपलब्ध असलेल्या ‘अयाली’ (Ayali) या तमिळ वेब सीरिजने सध्या प्रेक्षकांची झोप उडवली आहे. या सीरिजचे कथानक आणि त्यातील थरार इतका जबरदस्त आहे की, IMDb वर या सीरिजला तब्बल ८.६/१० अशी उत्कृष्ट रेटिंग मिळाली आहे.

काय आहे ‘अयाली’ची रंजक आणि थरारक कथा?
‘अयाली’ या सीरिजची कथा तामिळनाडूच्या एका छोट्या आणि अत्यंत मागासलेल्या ‘वीरप्पन्नई’ नावाच्या गावावर आधारित आहे. या गावात गेल्या ५०० वर्षांपासून एक अत्यंत जाचक आणि अघोरी प्रथा पाळली जात असते. गावातील लोकांची अशी अंधश्रद्धा असते की, जर त्यांच्या गावातील कोणत्याही मुलीला मासिक पाळी आली आणि तिने ती गोष्ट लपवली किंवा वयात आल्यानंतर तिचे लग्न लावून दिले नाही, तर गावाची कुलदेवी ‘अयाली’ कोपेल. देवीचा कोप झाल्यास गावात दुष्काळ पडेल आणि गावेच्या गाव उद्ध्वस्त होईल, अशी भीती गावकऱ्यांच्या मनात ठासून भरलेली असते. या अंधश्रद्धेमुळे गावातील मुलींचे शिक्षण प्राथमिक शाळेतच थांबवले जाते आणि वयात येताच त्यांचे बळजबरीने लग्न लावून दिले जाते.

एका मुलीचा रूढी-परंपरांविरुद्धचा लढा
या अघोरी आणि जाचक प्रथेच्या विरोधात उभी राहते ‘तमिळसेल्वी’ नावाची एक लहान मुलगी. तिला डॉक्टर बनून समाजाची सेवा करायची असते, परंतु गावातील नियम तिच्या स्वप्नांच्या आड येत असतात. जेव्हा तमिळसेल्वी वयात येते (मासिक पाळी येते), तेव्हा ती हे सत्य तिच्या आईशिवाय संपूर्ण गावापासून लपवून ठेवते. जर गावकऱ्यांना हे समजले तर तिचे लग्न लावून दिले जाईल आणि तिचे डॉक्टर बनण्याचे स्वप्न भंग पावेल, याची तिला जाणीव असते. आपले शिक्षण पूर्ण करण्यासाठी ती दररोज मृत्यूच्या सावटाखाली आणि भीती सोसत गावात राहते. एका बाजूला देवीच्या कोपाची भीती आणि दुसऱ्या बाजूला गावकऱ्यांची क्रूर नजर, अशा अत्यंत तणावपूर्ण वातावरणात ही मालिका पुढे सरकते.

प्रेक्षकांची आणि समीक्षकांची पसंती
‘अयाली’ ही केवळ एक सामाजिक संदेश देणारी मालिका नाही, तर ती एक उत्तम सस्पेन्स-थ्रिलर ड्रामा आहे. दिग्दर्शक मुथुकुमार यांनी या सीरिजचे दिग्दर्शन अत्यंत प्रभावीपणे केले आहे. ८ भागांच्या या सीरिजमध्ये प्रत्येक भागाच्या शेवटी असा काही ट्विस्ट येतो, ज्यामुळे प्रेक्षकांची उत्सुकता शिगेला पोहोचते. मुख्य भूमिकेत असलेल्या अभिनेत्री अभि नक्षत्र हिने तमिळसेल्वीची भूमिका अत्यंत जिवंत केली आहे. तिच्या चेहऱ्यावरील भीती, जिद्द आणि संघर्ष प्रेक्षकांच्या काळजाला भिडतो.

‘कांतारा’ आणि ‘तुंबाड’शी तुलना का?
ज्याप्रमाणे ‘कांतारा’मध्ये दाखवलेली स्थानिक देवतेची संस्कृती आणि ‘तुंबाड’मधील हस्तरची कथा प्रेक्षकांना एका वेगळ्याच विश्वात घेऊन जाते, अगदी तसेच वातावरण ‘अयाली’मध्ये पाहायला मिळते. गावातील अंगावर काटा आणणारे नियम, रात्रीच्या वेळचे रहस्यमय चित्रीकरण आणि पार्श्वसंगीत (Background Music) यामुळे ही सीरिज प्रेक्षकांना खिळवून ठेवण्यात यशस्वी ठरली आहे. ही सीरिज तामिळ भाषेसोबतच हिंदी, तेलगू आणि कन्नड भाषांमध्येही डब करण्यात आली आहे.

जर तुम्ही वीकेंडला काहीतरी वेगळे, दर्जेदार आणि खिळवून ठेवणारे पाहण्याचा विचार करत असाल, तर ‘अयाली’ हा तुमच्यासाठी एक सर्वोत्तम पर्याय आहे.