डॉक्टर पतीच्या छळाला कंटाळून नवविवाहितेची आत्महत्या!
मुंबई : निर्भीड समाचार वृत्तसेवा
ठाणे जिल्ह्यातील अंबरनाथ शहरातून एक मन सुन्न करणारी आणि संतापजनक घटना समोर आली आहे. अंबरनाथ पूर्व भागात राहणाऱ्या एका २६ वर्षीय नवविवाहितेने लग्नानंतर अवघ्या ४५ दिवसांत राहत्या घरी गळफास घेऊन आपले जीवन संपवले. मृत तरुणीचे नाव विशाखा टिळेकर (वय २६) असे आहे. या आत्महत्येमागे तिचा डॉक्टर पती आणि सासरच्या मंडळींचा क्रूर मानसिक व शारीरिक छळ कारणीभूत असल्याचा गंभीर आरोप मुलीच्या माहेरच्यांनी केला आहे. या प्रकरणी अंबरनाथच्या शिवाजीनगर पोलिसांनी मुख्य आरोपी डॉक्टर पतीसह तिघांना अटक केली आहे.
३० एप्रिलला थाटामाटात झाला होता विवाह
मिळालेल्या माहितीनुसार, विशाखाचा विवाह ३० एप्रिल २०२६ रोजी अंबरनाथ येथील नामांकित डॉ. नितीन टिळेकर याच्याशी अतिशय थाटामाटात झाला होता. विशाखाच्या वडिलांनी आपल्या मुलीच्या सुखासाठी लग्नात ऐपतीपेक्षा जास्त खर्च केला होता. लग्न झाल्यानंतर विशाखा अंबरनाथ येथील सासरी नांदायला गेली. मात्र, सुखी संसाराचे तिचे स्वप्न लग्नानंतर अवघ्या काही दिवसांतच भंगलं.
लग्नानंतर लगेचच हुंड्यासाठी छळ सुरू
माहेरच्यांनी पोलिसांना दिलेल्या तक्रारीनुसार, लग्नानंतर अवघ्या १५ दिवसांतच विशाखाचा छळ सुरू झाला. सासरच्या मंडळींकडून माहेरून आणखी सोने, मौल्यवान दागिने आणि रोकड आणण्यासाठी तिच्यावर दबाव टाकला जात होता. डॉक्टर पती नितीन, सासू छाया आणि दीर निनाद हे तिघेही मिळून विशाखाला पैशांसाठी मानसिक त्रास देऊ लागले होते. विशाखा फोनवर जेव्हा जेव्हा माहेरी बोलायची, तेव्हा ती रडून सासरच्या त्रासा बद्दल सांगायची, असे तिच्या नातेवाईकांनी म्हटले आहे.
बेडरूम आणि हॉलमध्ये CCTV कॅमेरे; घरातच कैद
या घटनेतील सर्वात धक्कादायक आणि संतापजनक बाब म्हणजे आरोपी डॉक्टर पती नितीन याने विशाखावर नजर ठेवण्यासाठी थेट घराच्या आत आणि बाहेर सीसीटीव्ही (CCTV) कॅमेरे बसवले होते. विशाखा दिवसभर काय करते, कोणाशी बोलते, कधी उठते-बसते या संपूर्ण गोष्टींवर हा डॉक्टर पती दवाखान्यात बसून मोबाईलद्वारे पाळत ठेवायचा. विशाखाला घरात कोणत्याही प्रकारचे स्वातंत्र्य नव्हते, ती एका प्रकारे घरातच कैद होती.
शेजारणीशी बोलल्याचा जाब विचारत अमानुष मारहाण
मृत्यूच्या दोन दिवसांपूर्वी विशाखा घराबाहेर आली असता सोसायटीतील एका शेजारील महिलेशी सहज बोलत उभी होती. हा सर्व प्रकार पती नितीन याने सीसीटीव्ही कॅमेऱ्यात लाईव्ह पाहिला. या किरकोळ कारणावरून नितीनने रात्री घरी आल्यावर विशाखाला अमानुष मारहाण केली. “तू शेजाऱ्यांशी का बोलतेस? आमच्या घरातील गोष्टी बाहेर का सांगतेस?” असा जाब विचारत तिचा प्रचंड मानसिक छळ करण्यात आला.
छळाला कंटाळून विशाखाचा गूढ अंत
पती आणि सासरच्या लोकांचा हा छळ असह्य झाल्याने शेवटी मंगळवारी (१६ जून २०२६) विशाखाने राहत्या घरात छताला गळफास लावून आत्महत्या केली. विशाखाचा मृतदेह पंख्याला लटकलेल्या अवस्थेत आढळून आल्यानंतर संपूर्ण परिसरात खळबळ उडाली. घटनेची माहिती मिळताच विशाखाच्या माहेरच्या लोकांनी अंबरनाथ गाठले आणि सासरच्यांवर हत्येचा संशय व्यक्त करत गोंधळ घातला.
डॉक्टर पतीसह तिघे गजाआड;
पोलीस तपास सुरूया घटनेनंतर विशाखाच्या कुटुंबीयांनी दिलेल्या तक्रारीवरून अंबरनाथच्या शिवाजीनगर पोलीस ठाण्यात हुंडाबळी आणि आत्महत्येस प्रवृत्त केल्याचा गुन्हा दाखल करण्यात आला आहे. पोलिसांनी घटनेचे गांभीर्य ओळखून तातडीने कारवाई करत आरोपी पती डॉ. नितीन टिळेकर, सासू छाया टिळेकर आणि दीर निनाद टिळेकर या तिघांनाही बेड्या ठोकल्या आहेत. पोलीस सध्या घरातील सीसीटीव्ही फुटेज आणि विशाखाचा मोबाईल जप्त करून पुढील तपास करत आहेत. एका उच्चशिक्षित डॉक्टर पतीनेच केलेल्या या क्रूर कृत्यामुळे संपूर्ण अंबरनाथ शहरात तीव्र संताप व्यक्त होत आहे.
