ठाण्यात मुजोरी! रस्त्यावर थुंकण्यास हटकल्याने वृद्धाला बेदम मारहाण!

मुंबई/ठाणे : निर्भीड समाचार वृत्तसेवा

ठाण्यातील जुपिटर हॉस्पिटलबाहेर एक अत्यंत संतापजनक आणि माणुसकीला काळीमा फासणारी घटना उघडकीस आली आहे. रस्यावर थुंकून अस्वच्छता पसरवणाऱ्या एका मुजोर ॲप-आधारित (ओला) वाहनचालकाला एका ७० वर्षीय ज्येष्ठ नागरिकाने केवळ परिसर स्वच्छ ठेवण्याची समज दिली. परंतु, या साध्याशा गोष्टीचा प्रचंड राग आल्याने त्या मुजोर चालकाने वयोवृद्ध आजोबांना त्यांच्या हतबल पत्नीसमोर भररस्त्यात बेदम मारहाण केली. या अमानुष हल्ल्यात आजोबांचा पाय फ्रॅक्चर झाला असून ते गंभीर जखमी झाले आहेत. या घटनेचा व्हिडिओ सोशल मीडियावर व्हायरल होताच ठाणेकरांमध्ये संतापाची लाट उसळली. त्यानंतर तातडीने अ‍ॅक्शन मोडमध्ये आलेल्या स्थानिक शिवसैनिकांनी या मुजोर चालकाला शोधून काढून ‘शिवसेना स्टाईल’ने चांगलाच चोप दिला आणि पुढील कारवाईसाठी पोलिसांच्या हवाली केले.

नेमकं काय घडलं?
मिळालेल्या माहितीनुसार, मंगळवारी संध्याकाळी ठाण्यातील जुपिटर हॉस्पिटल आणि कॅडबरी जंक्शन परिसराजवळ ही घटना घडली. एक वयोवृद्ध दांपत्य पायी जात असताना, तेथे गाडी थांबवून उभ्या असलेल्या निशांत धर शुक्ला (वय ४०) नावाच्या चालकाने गाडीची खिडकी उघडून थेट रस्त्यावर आणि पादचाऱ्यांच्या फुटपाथवर थुंकण्यास सुरुवात केली. ‘आपलं शहर स्वच्छ ठेवा, रस्त्यावर असे थुंकू नका’, अशी अत्यंत नम्र आणि सुजाण नागरिकासारखी समज त्या वयोवृद्ध आजोबांनी चालकाला दिली.

या साध्या आणि योग्य सूचनेमुळे चालकाचा अहंकार दुखावला गेला. त्याने गाडीतून खाली उतरून आजोबांना अत्यंत गलिच्छ भाषेत शिवीगाळ करण्यास सुरुवात केली. वाद एवढा वाढला की, त्या मुजोर चालकाने कायद्याची आणि वयाची कोणतीही पर्वा न करता वृद्ध आजोबांवर थेट हल्ला चढवला. त्याने आजोबांना जोरात धक्का देऊन जमिनीवर पाडले आणि लाथाबुक्क्यांनी बेदम मारहाण केली. इतकेच नव्हे, तर त्याने आजोबांच्या डोक्यात मारण्यासाठी रस्त्यावरील एक मोठा दगडही हातात घेतला होता. आजोबांची वृद्ध पत्नी पतीला वाचवण्यासाठी आणि चालकाला थांबवण्यासाठी हतबलतेने रडत-भिक मागत होती, पण त्या पाषाणहृदयी चालकाला तिचीही दया आली नाही.

व्हिडिओ व्हायरल आणि शिवसैनिकांचा संताप
या संपूर्ण अमानुष मारहाणीचा व्हिडिओ तेथे उपस्थित असलेल्या एका पादचाऱ्याने आपल्या मोबाईलमध्ये कैद केला आणि तो सोशल मीडियावर अपलोड केला. व्हिडिओ इंटरनेटवर वाऱ्यासारखा पसरला आणि “आपल्या सुसंस्कृत महाराष्ट्रात ज्येष्ठांवर असे अत्याचार होणार का?”, असा संतप्त सवाल नागरिकांकडून उपस्थित केला जाऊ लागला.

हा व्हिडिओ समोर येताच राजकीय मतभेद बाजूला ठेवत शिवसेना (ठाकरे गट) आणि शिवसेना (शिंदे गट) या दोन्ही बाजूंचे स्थानिक कार्यकर्ते आणि युवासैनिक एकत्र आले. शिवसेना शाखाप्रमुख सुमित बोराटे आणि नितेश पाटोळे यांनी आपल्या सहकाऱ्यांसह या मुजोर चालकाचा शोध सुरू केला. अवघ्या काही तासांतच त्यांनी जुपिटर हॉस्पिटल परिसरातून पळून गेलेल्या त्या मुजोर चालकाला शोधून काढले.

भररस्त्यात ‘शिवसेना स्टाईल’ने चोप
वयोवृद्ध आणि असहाय आजोबांवर हात उचलणाऱ्या त्या मुजोर चालकाला शिवसैनिकांनी गाठले आणि त्याची सगळी मुजोरी उतरवली. “ज्येष्ठ नागरिकांवर हात उचलण्याची हिंमत होतेच कशी?”, असा जाब विचारत शिवसैनिकांनी त्याला भररस्त्यात ‘शिवसेना स्टाईल’ने चांगलाच धडा शिकवला. त्यानंतर कार्यकर्त्यांनी त्याला पकडून थेट वर्तकनगर पोलीस ठाण्यात आणले. पोलिसांनी त्याला तातडीने ताब्यात घेतले असून त्याच्यावर विविध कलमांखाली गुन्हे दाखल केले आहेत.

उपमुख्यमंत्री एकनाथ शिंदेंची गंभीर दखल; ‘कलम ३०७’ लावण्याचे आदेश
या घटनेची गांभीर्याने दखल थेट महाराष्ट्राचे उपमुख्यमंत्री एकनाथ शिंदे यांनी घेतली आहे. त्यांनी थेट दिल्लीमधून ठाण्याचे पोलीस आयुक्त आशुतोष डुंबरे यांना फोन करून या प्रकरणात अत्यंत कडक पावले उचलण्याचे निर्देश दिले. “स्वच्छतेचा आग्रह धरणाऱ्या एका वरिष्ठ नागरिकाला अशा प्रकारे दगड घेऊन रक्तबंबाळ करेपर्यंत मारहाण करणे आणि त्यांचा पाय तोडणे हा अत्यंत गंभीर गुन्हा आहे. ही मुजोरी कदापि खपवून घेतली जाणार नाही,” अशा शब्दांत उपमुख्यमंत्र्यांनी तीव्र संताप व्यक्त केला. तसेच या मुजोर चालकावर थेट ‘कलम ३०७’ (हत्येचा प्रयत्न) अंतर्गत गुन्हा दाखल करण्याचे आदेश त्यांनी पोलिसांना दिले आहेत.

या घटनेमुळे शहरातील सार्वजनिक ठिकाणी वावरणाऱ्या समाजकंटकांवर आणि मुजोर चालकांवर कायद्याचा वचक असणे किती गरजेचे आहे, हा प्रश्न पुन्हा एकदा ऐरणीवर आला आहे. शिवसैनिकांनी दाखवलेल्या या तत्परतेचे आणि उपमुख्यमंत्री एकनाथ शिंदे यांनी घेतलेल्या आक्रमक भूमिकेचे ठाणेकरांकडून जोरदार स्वागत केले जात आहे.