ग्रामपंचायतीच्या हद्दीत हक्काची आणि पुरेशी स्मशानभूमीसाठी जागा उपलब्ध करून द्यावी, या प्रमुख मागणीसाठी स्थानिक तरुण आकाश पाटील कोकणे गेल्या ६ दिवसांपासून आमरण उपोषणाला बसले आहेत. प्रशासनाच्या उदासीन कारभाराविरोधात पुकारलेल्या या उपोषणाचा आज सहावा दिवस असून, आंदोलकाची प्रकृती खालावत चालल्याने गावकऱ्यांमध्ये तीव्र संताप व्यक्त होत आहे. दरम्यान, उपोषण स्थळाला गावातील अनेक प्रमुख नागरिक आणि प्रतिष्ठितांनी भेट देऊन आकाश कोकणे यांच्या मागणीला जाहीर पाठिंबा दर्शवला आहे.

निपाणी सावरगाव येथील मृतदेहांवर अंत्यसंस्कार करण्यासाठी योग्य आणि हक्काची स्मशानभूमी नसल्यामुळे गावकऱ्यांना अनेक वर्षांपासून प्रचंड हाल अपेष्टा सहन कराव्या लागत आहेत. पावसाळ्यात किंवा रात्रीच्या वेळी अंत्यसंस्कार करताना अनेक अडचणींचा सामना करावा लागतो. या गंभीर समस्येकडे प्रशासनाचे लक्ष वेधण्यासाठी अनेकदा निवेदने देण्यात आली, मात्र त्यावर कोणतीही ठोस कारवाई झाली नाही. अखेर गावकऱ्यांच्या सहनशीलतेचा अंत झाल्याने आकाश पाटील कोकणे यांनी थेट उपोषणाचे हत्यार उपसले आहे.गेल्या ६ दिवसांपासून त्यांनी अन्नत्याग केला असून, केवळ पाणी पिऊन ते उपोषण करत आहेत. दिवसेंदिवस त्यांचा लढा तीव्र होत चालला असून, प्रशासनाने अद्याप यावर कोणताही ठोस तोडगा न काढल्यामुळे निपाणी सावरगावमधील वातावरण चांगलेच तापले आहे.

आकाश कोकणे यांच्या या न्याय्य लढ्याला संपूर्ण गावातून उत्स्फूर्त पाठिंबा मिळत आहे. आज उपोषण स्थळी जाऊन अनेक सामाजिक कार्यकर्ते आणि गावातील ज्येष्ठ मंडळींनी त्यांची भेट घेतली आणि त्यांच्या प्रकृतीची विचारपूस केली.यावेळी निपाणी सावरगावचे पोलीस पाटील ज्ञानेश्वर कोकणे, प्रसिद्ध सामाजिक कार्यकर्ते प्रकाशभाऊ वाघमारे सुगावकर, आणि तुकाराम पाटील कोकणे यांच्यासह गावातील असंख्य तरुण आणि नागरिक मोठ्या संख्येने उपस्थित होते. “आकाश कोकणे हे केवळ स्वतःसाठी नाही, तर संपूर्ण गावाच्या हितासाठी आणि हक्कासाठी लढत आहेत. त्यांच्या या आंदोलनात संपूर्ण गाव त्यांच्या पाठीशी खंबीरपणे उभा आहे,” अशा भावना उपस्थित नेत्यांनी आणि गावकऱ्यांनी यावेळी व्यक्त केल्या.

उपोषण स्थळी जमलेल्या नागरिकांनी प्रशासनाच्या संथ कारभारावर जोरदार टीका केली. गावच्या पोलीस पाटीलांनी सांगितले की, स्मशानभूमी हा मानवी हक्काचा आणि संवेदनशील विषय आहे. हक्काची जागा नसल्यामुळे अंत्यसंस्काराच्या वेळी अनेकदा वाद निर्माण होतात किंवा उघड्यावर अंत्यसंस्कार करावे लागतात, ही अत्यंत लाजीरवाणी बाब आहे. प्रकाशभाऊ वाघमारे सुगावकर यांनी इशारा दिला की, जर पुढील २४ तासांत महसूल विभाग आणि संबंधित अधिकाऱ्यांनी उपोषण स्थळी येऊन लेखी आश्वासन दिले नाही, तर हे आंदोलन केवळ उपोषणापुरते मर्यादित न राहता संपूर्ण गाव रस्त्यावर उतरून तीव्र चक्काजाम आंदोलन करेल.

सलग ६ दिवस अन्न न घेतल्यामुळे आकाश पाटील कोकणे यांच्या शरीरातील साखरेचे प्रमाण (शुगर लेव्हल) कमी झाले असून त्यांना प्रचंड थकवा जाणवू लागला आहे. स्थानिक डॉक्टरांच्या पथकाने त्यांची तपासणी केली असून त्यांना विश्रांती घेण्याचा सल्ला दिला आहे. मात्र, “जोपर्यंत स्मशानभूमीसाठी अधिकृत जागा मंजूर होत नाही आणि तसा शासकीय आदेश आमच्या हातात पडत नाही, तोपर्यंत मी उपोषण सोडणार नाही,” या आपल्या भूमिकेवर आकाश कोकणे ठाम आहेत. तरुण कार्यकर्त्याच्या या दृढ निश्चयामुळे गावकऱ्यांमधील प्रशासनाविरोधातील असंतोष अधिकच वाढला आहे.

आता या संपूर्ण प्रकरणात तालुका प्रशासन, तहसीलदार आणि जिल्हाधिकारी काय भूमिका घेतात आणि निपाणी सावरगावचा हा प्रलंबित प्रश्न कधी सुटतो, याकडे सर्वांचे लक्ष लागले आहे.

The post स्मशानभूमीसाठी निपाणी सावरगाव येथे ६ दिवसांपासून उपोषण appeared first on Nirbhid Samachar.