उत्तर प्रदेशातील आग्रा येथून ‘ऑनर किलिंग’ची (अभिमान किंवा प्रतिष्ठेसाठी हत्या) एक अत्यंत धक्कादायक आणि मन सुन्न करणारी घटना समोर आली आहे. दोन्ही कुटुंबांचा तीव्र विरोध पत्करून सीमा सुरक्षा दलातील (ITBP) एका जवानाशी कोर्ट मॅरेज करणाऱ्या २४ वर्षीय अंकिता शर्मा हिची तिच्याच जन्मदात्या बापाने अत्यंत क्रूरपणे गळा आवळून हत्या केली आहे. ही थरारक घटना आग्रा जिल्ह्यातील जैतपूर पोलीस ठाण्याच्या हद्दीतील प्रताप नगर (नंदगवा रोड) भागात घडली. याप्रकरणी पोलिसांनी तातडीने कारवाई करत आरोपी पिता विमल शर्मा याला अटक केली आहे.

पोलीस तपासात समोर आलेल्या माहितीनुसार, मयत तरुणी अंकिता शर्मा हिचे नहटोली गावातील रहिवासी आणि ‘भारत-तिब्बत सीमा पोलीस’ (ITBP) दलात कार्यरत असलेले जवान अमित पचौरी यांच्यासोबत गेल्या काही काळापासून प्रेमसंबंध होते. मात्र, या दोघांच्याही आंतरजातीय प्रेमसंबंधांना दोन्ही बाजूंच्या कुटुंबीयांचा तीव्र विरोध होता. कुटुंबाचा हा विरोध डावलून अंकिता आणि अमित यांनी सुमारे चार महिन्यांपूर्वी (फेब्रुवारी २०२६ मध्ये) कायदेशीररीत्या कोर्ट मॅरेज (प्रेम विवाह) केले होते.न्यायालयात विवाह नोंदणी झाल्यानंतर नवरदेव अमित पचौरी देशाच्या सेवेसाठी आपल्या कर्तव्यावर (Posting) रुजू झाला होता. तर दुसरीकडे, अंकिता तिच्या आग्रा येथील माहेरीच राहत होती.

अंकिताने तिच्या इच्छेविरुद्ध घेतलेल्या या निर्णयामुळे तिचे कुटुंबीय आणि मुख्यत्वे तिचे वडील विमल शर्मा हे प्रचंड संतापलेले होते. लग्न झाल्याची माहिती मिळाल्यापासून घरात सतत वाद आणि तणावाचे वातावरण होते. विमल शर्मा याने अंकितावर अमितसोबतचे हे नाते तोडण्यासाठी आणि संबंध संपवण्यासाठी वारंवार दबाव आणला होता. मात्र, अंकिताने आपल्या नवऱ्यावर असलेल्या प्रेमापोटी हे नाते तोडण्यास स्पष्ट शब्दांत नकार दिला. याच गोष्टीचा राग मनात धरून रविवारी रात्री घरात पुन्हा एकदा मोठा वाद झाला. या वादाचे रूपांतर हाणामारीत झाले आणि संतापलेल्या पित्याने अंकिताला बेदम मारहाण करत तिच्याच ओढणीने तिचा गळा आवळून खून केला.

हत्या केल्यानंतर आरोपी विमल शर्मा याने घरातील इतर सदस्यांना म्हणजेच अंकिताची आई आणि भावाला तातडीने घराबाहेर जाण्यास सांगितले. त्यानंतर तो स्वतः रात्रभर अंकिताच्या मृतदेहाशेजारीच शांतपणे बसून राहिला.मध्यरात्रीच्या सुमारास घरातून अंकिताचा प्रचंड किंचाळण्याचा आवाज शेजाऱ्यांनी ऐकला होता. त्यानंतर घरातील सर्व दिवे बंद झाले आणि बराच वेळ दरवाजा ठोठावूनही आतून कोणताही प्रतिसाद मिळाला नाही. शेजाऱ्यांना काहीतरी अघटित घडल्याचा संशय आल्याने त्यांनी तातडीने ‘डायल ११२’ वर फोन करून पोलिसांना याची माहिती दिली.

माहिती मिळताच जैतपूर पोलीस ठाण्याचे पथक घटनास्थळी दाखल झाले. पोलिसांनी घराचा दरवाजा तोडून आत प्रवेश केला असता, समोरचे दृश्य पाहून पोलिसांचेही काळीज हेलावले. २४ वर्षांची अंकिता जमिनीवर बेशुद्ध अवस्थेत पडली होती, तिच्या गळ्याभोवती ओढणीचा फंदा घट्ट आवळलेला होता आणि तिच्या तोंडातून रक्त येत होते. पोलिसांनी तिला तातडीने उपचारासाठी रुग्णालयात नेले, मात्र डॉक्टरांनी तिला तपासून मृत घोषित केले.

आग्रा पूर्वचे पोलीस उपायुक्त अभिषेक कुमार अग्रवाल यांनी दिलेल्या माहितीनुसार, या ऑनर किलिंग प्रकरणाची गंभीर दखल घेण्यात आली असून आरोपी पिता विमल शर्मा याला घटनास्थळावरूनच अटक करण्यात आली आहे. त्याने चौकशीदरम्यान आपला गुन्हा कबूल केला असून, रागाच्या भरात हे पाऊल उचलल्याचे सांगितले. घटनेनंतर मृत तरुणीची आई सीता आणि भाऊ अंकुश हे घरातून फरार झाले असून पोलीस त्यांचा शोध घेत आहेत.कर्तव्यावर असलेल्या जवान अमित पचौरी यांना या हृदयद्रावक घटनेची माहिती देण्यात आली असून संपूर्ण परिसरात या क्रूर ‘ऑनर किलिंग’मुळे प्रचंड खळबळ उडाली आहे आणि तीव्र संताप व्यक्त केला जात आहे.

The post जवानाशी कोर्ट मॅरेज केल्यामुळे बापानेच केला लेकीचा मर्डर! appeared first on Nirbhid Samachar.